კატალონიის ,,ბარსელონა," რომელსაც ფინანსური პრობლემები კვლავ აწუხებს, ნახევარდაცვის გასაძლიერებლად ბიუჯეტურ მოთამაშეებს ეძებს, მაროკოს აზედ უნაჰი კი მათთვის მისაღები ვარიანტია.



,,ანჟერის" ნახევარმცველი კატარის მუნდიალზე მაროკოს ნაკრების შემადგენლობაში ერთ-ერთი ყველაზე გამორჩეული მოთამაშეა. მსოფლიო ჩემპიონატზე მისი შთამბეჭდავი პერფორმანსი კატალონიელ სკაუტებს უყურადღებოდ არ დარჩენიათ და Mundo Deportivo-ს ინფორმაციით, ზამთრის სატრანსფერო ფანჯარაზე ისინი მაროკოელი ნახევარმცველის შეძენას შეეცდებიან.

აზედინ უნაჰი ამჟამად ,,ანჟერის" ღირსებას იცავს და მისი ღირებულება 5 მილიონ ევროდაა შეფასებული, თუმცა მსოფლიო ჩემპიონატზე წარმატებული თამაშის შემდეგ ივარაუდება, რომ მისი ღირებულება ერთი-ორად გაიზრდება. უნაჰიმ ,,ანჟერის" შემადგენლობაში 47 მატჩი ჩაატარა და თავი 2 გოლით და 2 საგოლე გადაცემით გამოიჩინა. მაროკოს ნაკრებთან ერთად კი ის მუნდიალის ნახევარფინალში გავიდა, სადაც 14 დეკემბერს, 23:00 საათზე საფრანგეთს დაუპირისპირდება.