არგენტინის ნაკრების ფეხბურთელმა ლიონელ მესიმ ნიდერლანდებთან მატჩისშემდგომ კომენტარში თქვა, რომ საქმე არც დამატებით დრომდე და არც პენალტების სერიამდე უნდა მისულიყო.

„დიდი სიხარული და ბედნიერებაა... თუმცა, არც დამატებითი დრო უნდა ყოფილიყო, არც პენალტების სერია. ტანჯვა მოგვიწია, მაგრამ მომდევნო ეტაპზე ვართ და ეს მშვენიერია. ვან გაალი ამბობს, რომ მისი გუნდი კარგ ფეხბურთს თამაშობს, მაგრამ ერთადერთი, რაც მათ გააკეთეს მაღალ ფეხბურთელებზე გრძელი პასები იყო.

ხორვატიამ აჩვენა, რომ შესანიშნავი გუნდია. ზოგიერთ მომენტებში ბრაზილიასთან თანაბრად ითამაშეს და აჯობეს კიდეც. ხორვატებს დიდი ხანია ეს მწვრთნელი ჰყავთ და ერთმანეთს კარგად იცნობენ.

მსაჯზე ძალიან გაბრაზებული ვარ, არ მინდა მასზე საუბარი, რადგან გულწრფელი ვერ ვიქნები. და თუკი გულწრფელი ვიქენი, დავისჯები. თამაშის დროს გვეშინოდა, რადგან ვიცოდით, ვინ იყო. ფიფამ სიტუაციას უნდა გადახედოს, არ შეიძლება ამგვარ მატჩზე ისეთი მსაჯის დანიშვნა, რომელიც დონეს არ შეესაბამება და დავალებას ვერ ასრულებს“, - თქვა მესიმ.

არგენტინის ნაკრებმა მეოთხედფინალში ნიდერლანდები პენალტების სერიაში დაამარცხა, ნახევარფინალში კი, 13 დეკემბერს, ეთამაშება ხორვატიის ნაკრებს, რომელმაც ასევე პენალტების სერიის შედეგად, მეოთხედფინალში ბრაზილიას სძლია.