ესპანეთის ნაკრების ახალი მთავარი მწვრთნელის ვინაობა ცნობილია - ლუის დე ლა ფუენტე. ინფორმაცია ოფიციალურად დადასტურდა.

დე ლა ფუენტეს ოფიციალურად 12 დეკემბერს წარადგენენ. ის აქამდე ესპანეთის 21-წლამდე ნაკრების მთავარი მწვრთნელი იყო და დააწინაურეს. მან ლუის ენრიკე შეცვალა, რომელმაც წარუმატებელი მუნდიალის შემდეგ პოსტი დატოვა.

61 წლის ლუის დე ლა ფუენტე ესპანეთის 21-წლამდე ნაკრებში 2018 წლიდან მუშაობდა და გუნდს 2019 წელს ევროპის ჩემპიონატი მოაგებინა, ხოლო მანამდე 19-წლამდელებიც ევროპის ჩემპიონი გახადა 2015 წელს. გარდა ამისა, ესპანეთს ვერცხლის მედალი მოუტანა ტოკიოს ოლიმპიადაზე. დე ლა ფუენტე სხვადასხვა დროს „ბილბაოსა“ და „ალავესის“ მთავარი მწვრთნელიც იყო.

შეგახსენებთ, ესპანეთის ნაკრები ევრო 2024-ის შესარჩევ ეტაპზე საქართველოს ნაკრების მეტოქეა. ესპანელები საქართველოს 8 სექტემბერსა და 19 ნოემბერს დაუპირისპირდებიან.