სხვა

0:17 | 3.12.2022 | ნანახია [] - ჯერ

ოლიმპიადის გამო, 2024 წლის ტურ დე ფრანსი პარიზში არ დასრულდება

1905 წლის შემდგ პირველად, ტურ დე ფრანსის ველომარათონი 2024 წელს პარიზში არ დასრულდება. ამის მიზეზი, ოლიმპიური თამაშებია, რომელსაც საფრანგეთის დედაქალაქი უმასპინძლებს. დიდი ველორბოლის სააღლუმე, ბოლო ეტაპს, ქალაქი ნიცა უმასპინძლებს.

ტურის განრიგი ერთი კვირით გადასწიეს, რათა ოლიმპიური თამაშების საგზაო ველორბოლებს არ დამთხვეოდა. მაგრამ ამის მიუხედავად, ის 21 ივლისს უნდა დასრულდეს, ოლიმპიადის გახსნის ცერემონიამდე ხუთი დღით ადრე.

ნიცაში ტურ დე ფრანსის ეტაპი სულ 37-ჯერ არის გამართული. ამასთან, ამ ხმელთაშუაზღვის პირა ქალაქში რბოლა ორჯერ (1981 და 2020 წლებში) დაიწყო.

„ნიცა ქალაქია, რომელიც ბრწყინავს, ის მთელ მსოფლიოშია ცნობილი. ეს ლამაზი ადგილია, ახლოსაა მთები. ქალაქში განსაკუთრებული ატმოსფეროა და შესანიშნავი ტრასა“, - ამბობს ტურის დირექტორი კრისტიან პრუდომი.

სავარაუდოდ, არ იქნება სააღლუმე ეტაპი. ამის ნაცვლად, მარათონი დროზე რბოლით დასრულდება, რომელზეც ალბათ გამარჯვებულის ვინაობაც გაირკვევა. ბოლოს დროზე რბოლით ტური 1989 წელს დასრულდა და მაშინ ამერიკელმა გრეგ ლემონდმა გაიმარჯვა, რომელმაც სწორედ დროზე რბოლის მოგების შემდგ, რვა წამით გაასწრო ფრანგ ლორან ფინიონს.

წინასწარი ვარაუდით, 2024 წლის ტური ფლორენციაში დაიწყება და პირველ სამ ეტაპს იტალია უმასპინძლებს. თუმცა საბოლოო მარშრუტი და განრიგი ჯერ დამტკიცებული არ არის.

0.112534