კატარის მსოფლიო ჩემპიონატზე B ჯგუფის მესამე ტურში ინგლისისა და უელსის მატჩი გაიმართება, რომელიც სატურნირო დატვირთვასთან ერთად პრინციპულ ხასიათსაც ატარებს.



უელსსა და ინგლისს შორის პოლიტიკური დაპირისპირება გაერთიანებული სამეფოს ერთ-ერთი უმთავრესი საკითხია, თუმცა ამჯერად ამ გუნდებს ურთიერთობის გარკვევა მწვანე მინდორზე, მსოფლიო ჩემპიონატის ეგიდით მოუწევთ. ერთი შეხედვით, ინგლისი სახარბიელო მდგომარეობაშია, 4 ქულით B ჯგუფს ლიდერობს, უელსი კი პირიქით, აშშ-სთან მოპოვებული ქულის იმედადაა. ამის მიუხედავად, თეორიული შანსები კამრის მაინც აქვს შემორჩენილი და მითუმეტეს, ასეთ პრინციპულ მეტოქესთან 3 ქულის მოსაპოვებლად ძალ-ღონეს ნამდვილად არ დაიშურებს.

,,სამი ლომის" პირველი მატჩი კატარის მუნდიალზე ძალიან თვალსასეირო გამოდგა. ჯერ-ჯერობით ყველაზე უხვგოლიანი მატჩი სწორედ ინგლისსა და ირანს შორის გაიმართა, რომელშიც ბრიტანელებმა 6:2 იმარჯვეს. აბსოლიტურად კონტრასტული იყო მათი მეორე მატჩი აშშ-სთან, რომელშიც თავიანთი უხეირო თამაშის გასამართლებლად, ტრადიციულად, მიზეზების მოძიება დაიწყეს - თამაშამდე 1 საათით ადრე კონდიციონერები გამოგვირთეს და ამის გამო ვერ ვითამაშეთო. გუნდს მედისონი დაუბრუნდა, მეისონ მაუნტის უთამაშებლობის გამო კი საუთგეითმა ბევრი კრიტიკა დაიმსახურა, ვნახოთ გაითვალისწინებს თუ არა დაშვებულ შეცდომებს ინგლისელთა თავკაცი და მოახერხებს თუ არა ,,სამი ლომის" ჯგუფიდან გაყვანას.

უელსის ნაკრები ირანთან თავისი მეორე ფრისკენაც მიდიოდა, თუმცა მეკარის უხეში თამაშის გამო, ბოლო წუთები 10-კაცით გაატარა, ირანისგან 2 ბურთი მიიღო და თავი ძალიან რთულ სიტუაციაში ჩაიგდო. რობ პეიჯის გუნდს ინგლისთან მხოლოდ და მხოლოდ გამარჯვება ესაჭიროება, რათა ჯგუფიდან გასვლა მოახერხოს და ამ შემთხვევაშიც, თუ ეს გამარჯვება დიდი ანგარიშით არ გამოვა, მეტოქეზე იქნება დამოკიდებული.

სტატისტიკა

ამ გუნდებს ერთმანეთის წინააღმდეგ უამრავი მატჩი აქვთ ჩატარებული - სტატისტიკა კი ასეთია: ინგლისი - 68 მოგება, უელსი - 14 მოგება, ფრე - 21

ინგლისის ნაკრებს მსოფლიო ჩემპიონატების ისტორიაში ყველაზე მეტი 0:0 აქვთ ნათამაშები - ეს რიცხვი 12-ს შეადგენს

ბოლო სამი დიდი ტურნირის განმავლობაში, უელსი არასდროს გამოთიშულა ისე, რომ ერთი თამაში მაინც არ მოეგოს.

სავარაუდო შემადგენლობები

29 ნოემბერი, 23:00 საათი

ალ-რაიანი, ,,ალ-რაიან სთეიდიუმი"

უელსი (3-5-2): უორდი, დეივისი, როდონი, მეფემი, ნ. უილიამსი, ჯეიმსი, ამპადუ, რემზი, რობერტსი, მური, ბეილი.

ინგლისი (4-2-3-1): პიკფორდი, ტრიპიერი, სტოუნზი, მაგუაირი, შოუ, ბელინგემი, რაისი, სტერლინგი, მაუნტი, საკა, კეინი.