მსოფლიოს ჩემპიონატის მეორე ტური E ჯგუფში იაპონიისა და კოსტა რიკის დაპირისპირებით გაიხსნება. ეს არის ორი გუნდი, რომლებმაც პირველ ტურში სრულიად საპირისპირო შთაბეჭდილება დატოვეს და განსხვავებული შედეგები აჩვენეს.

თუმცა, ყოველი თამაში ახალი ფურცელია და გამორიცხული არაფერია. იაპონიის ნაკრები პირველი ტურის ერთ-ერთი მთავარი აღმოჩენა იყო, რადგან ტურნირის ფავორიტი გერმანიის ნაკრები დაამარცხა, მიუხედავად იმისა, რომ 73-ე წუთამდე აგებდა. თუმცა, შემდეგ 2 უპასუხო გოლი გაიტანა და უმნიშვნელოვანესი გამარჯვება მოიპოვა.

კოსტა რიკამ პირიქით - თავი შეირცხვინა და ძალიან ცუდი შთაბეჭდილება დატოვა. ჩრდილოამერიკელებმა ესპანეთის ნაკრებთან 0:7 წააგეს, რაც ამ ქვეყნის ისტორიაში ყველაზე დიდი ანგარიშით მარცხია მსოფლიოს ჩემპიონატზე. ამრიგად, იაპონია მოგების შემთხვევაში პრაქტიკულად მერვედფინალში გავა, ხოლო კოსტა რიკა წაგებით ნამდვილად ყოველგვარ შანსს დაკარგავს.

იაპონიის ნაკრებში ჰიროკი საკაის თამაში საეჭვოა, რადგან ბოლო ვარჯიში ტრავმის გამო გამოტოვა, მაგრამ გამოცდილ მარჯვენა მცველს ლონდონის „არსენალის“ ფეხბურთელი“ ტაკეჰირო ტომიასუ შეცვლის, რომელმაც ხუთშაბათს ვარჯიში ასევე გამოტოვა, მაგრამ სავარაუდოდ, თამაშისთვის მზად იქნება. ძირითადში გამოჩნდება რიცუ ასანო, რომელმაც გერმანიასთან გოლი გაიტანა და ის დაიზენ მაედას ადგილს დაიკავეს. კოსტა რიკის ნაკრებში ჯოელ კემპბელს ენტონი კონტრერასი უნდა შეუწყვილდეს, თუმცა, ბრაიან რუისი და ალვარო ზამორაც გამოთქვამენ პრეტენზიას, რომ თამაში სასტარტო შემადგენლობაში დაიწყონ.

სტატისტიკა

იაპონიამ მსოფლიოს ჩემპიონატზე პირველად 1998 წელს ითამაშა და მას შემდეგ მუნდიალი არ გამოუტოვებია. აზიელები წინა 6 შემთხვევიდან 3-ჯერ ჯგუფიდან გავიდნენ.

კოსტა რიკის ნაკრები მსოფლიოს ჩემპიონატზე მე-6-ედ მონაწილეობს საუკეთესო შედეგი 2014 წელს აჩვენა, როცა ურთულეს ჯგუფში, იტალიას, ინგლისსა და ურუგვაის აჯობა, მერვედფინალში საბერძნეთი დაამარცხა და მეოთხედფინალში პენალტების სერიაში ნიდერლანდებთან წააგო. გარდა ამისა, ისინი ჯგუფიდან 1990 წელსაც გავიდნენ. აღსანიშნავია, რომ კოსტა რიკა მუნდიალზე ზედიზედ მესამედ თავის ისტორიაში პირველად თამაშობს.

კოსტა რიკა ბოლო ნაკრებია, რომელმაც ამ მსოფლიოს ჩემპიონატის საგზური მოიპოვა (მიმდინარე წლის ივნისში).

ლუის ფერნანდო სუარესისთვის ეს მესამე მსოფლიოს ჩემპიონატია. კოლუმბიელი მწვრთნელი მანამდე მუნდიალზე ეკვადორისა (2006) და ჰონდურასის ნაკრებთან (2014) ერთად იყო.

იაპონია და კოსტა რიკა ერთმანეთს 5-ჯერ შეხვედრიან და ყველა მატჩი ამხანაგური იყო. აზიელებს დიდი უპირატესობა აქვთ - 4 მოგება, 1 ფრე. ბოლოს ისინი 2018 წლის 11 სექტემბერს შეხვდნენ და იაპონიამ 3:0 მოიგო.

სავარაუდო შემადგენლობები

27 ნოემბერი, 14:00 საათი

ალ რაიანი, „აჰმად ბინ ალი სთედიუმი“

იაპონია (4-2-3-1): გონდა; ტომიასუ, იტაკურა, იოშიდა, ნაგატომო; ენდო, ტანაკა; იტო, კამადა, კუბო; ასანო

კოსტა რიკა (4-2-2-2): ნავასი; ვესტონი, კალვო, დუარტე, ოვიედო; ტეხედა, ბორხესი; ბენეტე, ფულერი; კემპბელი, კონტრერასი