ფეხბურთი

20:36 | 14.11.2022 | ნანახია [] - ჯერ

ლუკა ლოჩოშვილი: "საინტერესოა როგორ დონეზე ვართ, გუნდში პოზიტიური განწყობაა" (+VIDEO)

საქართველოს ნაკრებმა წლის ბოლო შეხვედრისთვის მზადება დაიწყო, რომელსაც 17 ნოემბერს, მაროკოს ნაკრების წინააღმდეგ გამართავს.

ვილი სანიოლის გუნდი თბილისში შეიკრიბა, ხოლო ხვალ არაბეთის გაერთიანებული საამიროების ქალაქ შარჯაში გაემგზავრება. პირველ საწვრთნელ პროცესში 15 ფეხბურთელი მონაწილეობდა. საქართველოს ნაკრების მცველმა ლუკა ლოჩოშვილმა კი კომენტარი გააკეთა და აღნიშნა, რომ სტატუსის მიუხედავად, მაროკოსთან ძალიან მნიშვნელოვანი თამაში იქნება.

"ძალიან მნიშვნელოვანი თამაში გველის. მაროკო ძლიერი ნაკრებია, მსოფლიო ჩემპიონატზე ასპარეზობს და საინტერესო სპარინგი იქნება. შემდეგ ციკლში ძლიერი მეტოქეები გვყავს და საინტერესოა, როგორ დონეზე ვართ. კარგი სერია გვაქვს, გუნდში პოზიტიური განწყობაა და ვიმედოვნებ, ასე გაგრძელდება. თითოეული ფეხბურთელი დღითიდღე ვითარდება და გუნდში ჯანსაღი კონკურენციაა", - თქვა ლოჩოშვილმა.

შეგახსენებთ, რომ საქართველოსა და მაროკოს საფეხბურთო ნაკრებების ამხანაგური შეხვედრა 17 ნოემბერს, 20:00 საათზე ქალაქ შარჯაში გაიმართება. საქართველოს ნაკრები აღნიშნულ თამაშს ერთწლიანი და 11-მატჩიანი წაუგებელი სერიით ხვდება, რომლის ფარგლებში ვილი სანიოლის გუნდმა 9 მატჩი მოიგო და ორჯერ ფრეს დასჯერდა.

0.138571