„ნაპოლიმ“ ჩემპიონთა ლიგის მეხუთე ტურში „რეინჯერსი“ იოლად დაამარცხა და ყველა ტურნირის ჩათვლით ზედიზედ მე-12 თამაში მოიგო, რითაც პირადი რეკორდი დაამყარა.

ლუჩანო სპალეტის გუნდმა მეტოქეს ძალიან ადვილად აჯობა და უკვე მე-16 წუთზე 2:0-ს იგებდა - ჯოვანი სიმეონეს დუბლით. მატჩის მიწურულს ლეო ოსტიგარმაც გაიტანა და 3:0. ჩვენთვის მთავარი ისაა, რომ ხვიჩა კვარაცხელიას არ უთამაშია. ლუჩანო სპალეტიმ ქართველ ფეხბურთელს დასვენების საშუალება მისცა. აღსანიშნავია, რომ კვარამ მიმდინარე სეზონში პირველი თამაში გამოტოვა.

„ნაპოლიმ“ A ჯგუფში 15 ქულა დააგროვა და ლიდერია, თუმცა ბოლო ტურში „ლივერპულთან“ მაინც მნიშვნელოვანი თამაში ელოდება პირველი ადგილისთვის, რომელსაც 3 ქულით უსწრებს და შინ 4:1-იც მოუგო.

ამრიგად, „აძურის“ ფანტასტიკური სერია გრძელდება და სეზონში უკვე დაუმარცხებელია, ხოლო ბოლო 12 მატჩი მიჯრით მოიგო. „ნაპოლი“ მომდევნო მატჩს 29 ოქტომბერს, „სასუოლოსთან“ ჩაატარებს.