ლონდონის „ჩელსი“ ჩემპიონთა ლიგის მერვედფინალისტთა რიგებს შეუერთდა. გრემ პოტერის გუნდმა ჯგუფური ეტაპის დასრულებამდე ერთი ტურით ადრე გაინაღდა პლეი-ოფის საგზური.

„ჩელსი“ ავსტრიაში „ზალცბურგს“ ესტუმრა და დაძაბულ ბრძოლაში 2:1 მოიგო. პირველი ტაიმი ლონდონელთა სასარგებლოდ მატეო კოვაჩიჩის გოლით დასრულდა, რასაც ავსტრიელებმა მეორე ნახევრის სტარტზე ადამუს გოლით უპასუხეს, მაგრამ კაი ჰავერტცმა „არისტოკრატებს“ მოაგებინა. ამრიგად, „ჩელსის“ ორი ტურის თავზე მხოლოდ ქულა ჰქონდა აქტივში, მაგრამ მას მერე 3 თამაში მოიგო და 10 ქულით ჯგუფიდან უკვე გავიდა. ბოლო ტურში ლონდონელები ზაგრების „დინამოს“ უმასპინძლებენ, რომელთანაც პირველ ტურში სტუმრად წააგეს და იმ წაგებას ტომას ტუხელის სამსახურიც შეეწირა.

დღის კიდევ ერთი ადრიანი მატჩი G ჯგუფში შედგა, სადაც დავით ხოჭოლავას „კოპენჰაგენი“ „სევილიას“ ესტუმრა და მესამე ადგილისთვის იბრძოდა, თუმცა დამარცხდა - 0:3. არადა, დანიის ჩემპიონი დიდი ხანი ღირსეულ წინააღმდეგობა უწევდა მეტოქეს, მაგრამ მატჩის მიწურულს ორი გოლი გაუშვა და უქულოდ დარჩა. ხოჭოლავამ წითელი ბარათი მიიღო. ქართველი მცველი მსაჯის მიერ კომპენსირებულ მეხუთე წუთზე გააძევეს, როცა ისკოს ეუხეშა და თავიდან ყვითელი ბარათი მიიღო, მაგრამ მომენტი VAR-ზე გადამოწმდა და წითელი უჩვენეს. შესაბამისად, ბოლო ტურში „დორტმუნდთან“ ვერ ითამაშებს.

„კოპენჰაგენს“ ხუთ ტურში 2 ქულა აქვს, გოლიც არ გაუტანია და ბოლო ადგილს თავს ვერ დააღწევს.

„ზალცბურგი“ – „ჩელსი“ 1:2 (0:1)

გოლები: 0:1 კოვაჩიჩი (23), 1:1 ადამუ (49), 1:2 ჰავერტცი (64)

„სევილია“ – „კოპენჰაგენი“ 3:0 (0:0)

გოლები: 1:0 ენ ნესირი (61), 2:0 ისკო (88), 3:0 მონტიელი (90)