ესპანეთში სტარტი აიღო მსოფლიოს 23-წლამდე ჩემპიონატმა თავისუფალ ჭიდაობაში, რომლის პირველ საშეჯიბრო დღეს ხალიჩაზე ხუთი ქართველი მოჭიდავე გავიდა და ორი მათგანი ფინალშია.

ფინალში გავიდა 70 კგ წონით კატეგორიაში გიორგი ელბაქიძე, რომელმაც ფინალამდე სამი შეხვედრა მოიგო, ხოლო 22 ოქტომბერს, ოქროს მედლისთვის ირანელ ამირჰომად იაზდანიჩერატის შეხვდება.

79 კგ წონით კატეგორიაში ფინალში ჭიდაობის უფლება მოიპოვა ვლადიმერ გამყრელიძემ, რომელმაც ოთხი შეხვედრა მოიგო ფა ფინალში ყაზახ დაულეტ იერგეშს დაუპირისპირდება.

ნახევარფინალში იყო გიორგი გეგელაშვილი (57 კგ), მაგრამ ამ ეტაპზე მარცხი განიცადა და ბრინჯაოს მედლისთვის იჭიდავებს. ბრინჯაოს შანსი აქვს ანდრო მარგიშვილსაც (97 კგ), რომელიც რეპეშაჟში იასპარეზებს, რომლის პირველ წრეს თუ დაძლევს, ხალიჩაზე მედლისთვის გავა. მედლის შანსი მხოლოდ გია უღრელიძემ დაკარგა, რომელიც ასპარეზობას მეორე წრეში გამოეთიშა.

22 ოქტომბერს, გარდა იმისა, რომ ორი ოქროსა და ორი ბრინჯაოსთვის იბრძოლებენ ქართველები, მსოფლიოს ჩემპიონატში ჩაერთვება კიდევ ხუთი ქართველი მოჭიდავე - რამაზ თურმანიძე, თემურ ბერუაშვილი, ევსემ შველიძე, მირიან მაისურაძე, სოლომონ მანაშვილი.