მსოფლიოს პირველმა ჩოგანმა, პოლონელმა იგა სვიატეკმა ამ სეზონში მერვე ტიტული სან დიეგოს ღია პირველობაზე მოიპოვა. ფინალში მან ტურნირზე საკვალიფიკაციო ეტაპიდან გასულ ხორვატ დონა ვეკიჩს 6-3, 3-6, 6-0 მოუგო.

„ვიცოდი, რომ ის შესანიშნავად აწოდებს და ამიტომ მინდოდა, რომ დაბრუნებისას ყურადღებიანი ვყოფილიყავი. ბევრს არ ვფიქრობდი, ჩემს ინტუიციას ვიყენებდი და ყოველი ბურთისთვის ვიბრძოდი“, - ყვება სვიატეკი.

პოლონელმა პირველ ბრეიკს პირველი სეტის მეექვსე გეიმში მიაღწია. ვეკიჩმა წვიმის გამო, შაბათის ნახევარფინალური შეხვედრა კვირას, ფინალის წინ, მოგებით დაასრულა და პირველი სეტის მიწურულს დაღლა დაეტყო. მოპოვებული ბრეიკით, სვიატეკი 4-2 დაწინაურდა და ეს უპირატესობა ხელიდან აღარ გაუშვია.

მეორე სეტში ვეკიჩს მეორე სუნთქვა გაეხსნა. მან ტიტულოვან მეტოქეს ბრძოლა გაუმართა. ხორვატი თავისი მთავარი იარაღის - ძლიერი მოწოდების და მძლავრი დარტყმების გამოყენებას ცდილობდა და საკმაოდ წარმატებით. ეს საკმარისი აღმოჩნდა სეტებში ანგარიშის გასათანაბრებლად.

მაგრამ ამან სვიატეკი გამოაფხიზლა. მან გადამწყვეტი სეტის მეორე გეიმშივე შეძლო მეტოქის მოწოდების აღება და 2-0 დაწინაურდა. და აქედან მოყოლებული, მეტოქეს ერთი გეიმიც აღარ დაუთმო.

სვიატეკს, ვინც მსოფლიოს პირველი ჩოგანი აპრილში, ჩოგბურთიდან ავსტრალიელი ეშლი ბარტის წასვლის შემდეგ გახდა, ამ სეზონში 64 მოგება და 8 წაგება აქვს. 21 წლის პოლონელმა აშშ-ის და საფრანგეთის ღია პირველობები მოიგო და სეზონს WTA-ის ფინალით დაასრულებს, რომელიც 31 ოქტომბერს, ამერიკის ფორტ უორტში გაიმართება.