მძიმე წონაში მსოფლიოს ყოფილი ჩემპიონი, ამერიკელი დეონტეი უაილდერი ამბობს, რომ ტაისონ ფიურის და ენტონი ჯოშუას შეხვედრის შემთხვევაში, ჯოშუა საკრივო სამყაროს გააოცებს და WBC-ს ჩემპიონს დაამარცხებს.

უკრაინელ ოლეკსანდრ უსიკთან ზედიზედ მეორედ დამარცხების შემდეგ, ჯოშუამ მოულოდნელად, ფიურისგან მიიღო შეხვედრის შეთავაზება. თუ შეთანხმება შედგა, ბრძოლა 3 დეკემბერს გაიმართება. ფიურის წარმომადგენელი ჯორჯ უორენი ამბობს, რომ ორი ბრიტანლის დაპირისპირება უკვე ჩაიშალა. მაგრამ ფიურის მსგავსი გამოხტომები ახასიათებს და ის ხშირად ცვლის გადაწყვეტილებებს. ეს მისი ერთგვარი სტილია.

„ჩემი აზრით, ენტონი ჯოშუა შეძლებს ტაისონ ფიურის დამარცხებას. ვიცი, რომ ეს სიგიჟედ ჩანს. ბევრი ამას იტყვის კიდეც. მაგრამ მე რეალურად მჯერა, რომ ჯოშუა მოიგებს. ჩემი აზრით, თუ მენტალურად კარგად მოემზადება, მას მწვერვალზე დაბრუნება შეუძლია“, - ამბობს ამერიკელი.

36 წლის უაილდერი სამჯერ შეხვედრია ფიურის. პირველად 2018 წელს და ის ბრძოლა ფრედ დასრულდა. ორი წლის შემდეგ, ბრიტანელმა უაილდერს ნოკაუტით მოუგო და მას WBC-ს ტიტული ჩამოართვა. შარშან კი ის ერთხელაც დაამარცხა.

შარშანვე ჯოშუა პირველად დამარცხდა უსიკთან და მას WBA-ის, WBO-ის, IBF-ის და IBO-ის ტიტულები გადააბარა. უკრაინელმა ეს ტიტულები რემატჩის მოგებით ახლახანს დაიცვა.

„ვფიქრობ, ის საკუთარ ძალებში დარწმუნებული არაა. მე ვიცი, რა არის საჭირო იმისთვის, რომ მებრძოლი, მკვლლი იყო - ენერგია, გრძნობა. მე მასში ამას ვერ ვხედავ. ფიზიკურად მას ყველაფერი შეუძლია. მაგრამ ზოგჯერ ამაზე მეტი აზროვნებას შეუძლია“, - ამბობს უაილდერი, ვინც 15 ოქტომბერს ბრძოლას გამართავს ფინელ-შვედ რობერტ ჰელენიუსთან.