მძიმე წონაში WBC-ს მსოფლიო ჩემპიონი, ბრიტანელი ტაისონ ფიური ამბობს, რომ ენტონი ჯოშუასთვის ბრძოლის შეთავაზებაზე პასუხი არ მიუღია, რაც ნიშნავს, რომ ეს შეხვედრა არ შედგება. ჯოშუას კონტრაქტზე ხელი ორშაბათამდე უნდა მოეწერა, რაც უცნობი მიზეზის გამო, არ მოხდა.

ფიურიმ თვის დასაწყისში განაცხადა, რომ რინგს დაუბრუნდება მხოლოდ იმისთვის, რომ ჯოშუასთან ბრძოლა გამართოს. ჯოშუას „258 მენეჯმენტმა“ და პრომოუტერმა „მატჩრუმ ბოქსინგმა“ რამდენიმე დღის წინათ გამოაცხადეს, რომ ფიურის გუნდის მიერ შეთავაზებულ ყველა პირობას დასთანხმდნენ, მაგრამ კომუნიკაცია დროებით, გაერთიანებული სამეფოს დედოფალ ელიზაბეთის გარდაცვალების გამო შეაჩერეს.

„ეს უკვე ფაქტია, ბოლო ვადა გავიდა. კონტრაქტზე ხელი მოწერილი არაა. ამიტომ, ჯოშუასთვის ეს ამბავი ოფიციალურად დასრულდა. შეუძლია დაივიწყოს. ვიცოდი, რომ ასე მოხდებოდა. არ მაინტესრესებს, ვინ რას იტყვის. იღბალს ვუსურვებ კარიერაში და ცხოვრებაში“, - ამბობს ფიური.

ჯოშუამ უკრაინელ ოლეკსანდრ უსიკთან მეორე ბრძოლაც წააგო და WBA-ის, WBO-ის, IBF-ის და IBO-ის ტიტულები მას დაუტოვა. შემდეგ კი განაცხადა, რომ მომდევნო ბრძოლას დეკემბერში გამართავს.

ფიურის ნათქვამი აქვს, რომ თუ ჯოშუა მასთან შეხვედრას არ დათანხმდება, მაშინ სხვა მეტოქეს მონახავს. თავის მხრივ, უსიკისთვის ერთადერთი „საინტერესო“ მეტოქე სწორედ ფიურია. მაგრამ წელს ბრძოლას აღარ აპირებს, რადგან დასვენება სჭირდება და დროის ოჯახთან გატარება სურს.