ფეხბურთი

21:07 | 21.09.2022 | ნანახია [] - ჯერ

ევრო 2024-ის საკვალიფიკაციო ეტაპის პროცედურა დამტკიცდა: საქართველო მეოთხე კალათაშია

უეფამ ევრო 2024-ის საკვალიფიკაციო ეტაპის პროცედურა ოფიციალურად დაადასტურა. შესარჩევ ტურნირში 53 ნაკრები ითამაშებს - მასპინძელ გერმანიას ფინალური ეტაპის საგზური ავტომატურად მოპოვებული აქვს, ხოლო რუსეთის ნაკრები უეფამ საკვალიფიკაციო ეტაპზე არ დაუშვა.

53 ნაკრები წილისყრის წინ შვიდ კალათაში განაწილდება, შედეგად შეიქმნება 10 ჯგუფი - 7 ხუთგუნდიანი და სამი ექვსგუნდიანი. ევრო 2024-ის საგზურს ჯგუფებში პირველ-მეორე ადგილოსნები ავტომატურად მოიპოვებენ. დანარჩენი სამი საგზურის მფლობელის ვინაობა კი ერთა ლიგის სამი დივიზიონის პლეი-ოფით გაირკვევა, რომელიც 2024 წლის მარტში გაიმართება.

წილისყრისთვის კალათები სექტემბრის სანაკრებო მატჩების შემდეგ შეივსება, მაგრამ უკვე ცნობილია, რომ საქართველოს ნაკრები ყველა შემთხვევაში მეოთხე კალათაში იქნება, ისევე, როგორც საბერძნეთი, თურქეთი და ყაზახეთი. გარდა ამისა, მეოთხე კალათაში კიდევ 5 გუნდი მოხვდება და ბუნებრივია, ისინი ერთ ჯგუფში ვერ მოხვდებიან. ევრო 2024-ის საკვალიფიკაციო ეტაპის წილისყრა 9 ოქტომბერს, ფრანკფურტში გაიმართება.

ევრო 2024-ის საკვალიფიკაციო ეტაპი 2023 წლის მარტში დაიწყება და ნოემბერში დასრულდება, ხოლო როგორც უკვე ვთქვით, 2024 წლის მარტში ერთა ლიგის პლეი-ოფი ჩატარდება. ევროპის ჩემპიონატს 2024 წლის 14 ივნისიდან 14 ივლისამდე გერმანიის 10 ქალაქი უმასპინძლებს - ბერლინი, მიუნხენი, დორტმუნდი, შტუტგარტი, ჰამბურგი, ლაიფციგი, ფრანკფურტი, გელზენკირხენი, კიოლნი და დიუსელდორფი.

0.103235