ავტოსპორტი

1:52 | 21.09.2022 | ნანახია [] - ჯერ

ფორმულა ერთი 2023 წელს: 24 რბოლით და ლას ვეგასით

ფორმულა ერთმა 2023 წლის სეზონის კალენდარი გამოაქვეყნა, რომელშიც 24 ეტაპი შედის და მათგან სამი ამერიკული. სეზონი ისევ ბაჰრეინში იწყება და აბუ დაბიში მთავრდება. არის სიახლეც - დიდი პრიზების ცირკს ლას ვეგასი უბრუნდება და ეს კალენდარში მესამე ამერიკული რბოლა იქნება.

სათამაშო ბიზნესის მსოფლიო დედაქალაქს კალენდარში ბოლოსწინა ეტაპი მისცეს. მისი დასრულებიდან ერთ კვირაში კი ქარავანი აბუ დაბის რბოლისთვის უნდა იყოს მზად. ეს ლოჯისტიკას ართულებს, რადგან ტექნიკით სავსე თვითმფრინავს, ჩვენი პლანეტის თითქმის ნახევრის შემოფრენა მოუწევს.

ლას ვეგასი დაასრულებს ოთხრბოლიან მონაკვეთს, რომელიც ოსტინში დაიწყება და მექსიკის და ბრაზილიის გავლით, ნევადას ეწვევა. კალენდარში ვეღარ შევიდა რუსეთის ეტაპი, რომელიც მომავალ წელს სანკტ პეტერბურგში უნდა გადაეტანათ. რუსეთი უკრაინაში შეჭრის გამო ისჯება.

საინტერესოა ისიც, რომ მომავალ სეზონი იმაზე ორი კვირით ადრე აიღებს სტარტს, ვიდრე მიმდინარე დაიწყო. კალენდარს უბრუნდება ჩინეთის დიდი პრიზი, რომელიც კორონავირუსის პანდემიის გამო, სამი წელია, არ ჩატარებულა. რბოლა ისევ შანჰაიში ჩატარდება.

კალენდარში არ შევიდა საფრანგეთის დიდი პრიზიც. სამაგიეროდ დაბრუნდა ყატარი, სადაც რბოლა პირველად 2021 წელს ჩატარდა, მაგრამ ამ სეზონში კალენდარს მიღმა დარჩა.

კიდევ ერთი საინტერესო სიახლე: ბელგიის ეტაპი ზაფხულის არდადეგების შემდეგ, პირველი იყო ხოლმე. მომავალ სეზონში კი არდადეგებამდე ბოლო იქნება. სეზონის მეორე ნახევარს კი ჰოლანდიის ეტაპი გახსნის.

ფორმულა 1-ის 2023 წლის კალენდარი

5 მარტი - ბაჰრეინი

19 მარტი - საუდის არაბეთი

2 აპრილი - ავსტრალია

16 აპრილი - ჩინეთი

30 აპრილი - აზერბაიჯანი

5 მაისი - აშშ (მაიამი)

21 მაისი - იტალია (იმოლა)

28 მაისი - მონაკო

4 ივნისი - ესპანეთი

18 ივნისი - კანადა

2 ივლისი - ავსტრია

9 ივლისი - ბრიტანეთი

23 ივლისი - უნგრეთი

30 ივლისი - ბელგია

27 აგვისტო - ჰოლანდია

3 სექტემბერი - იტალია (მონცა)

17 სექტემბერი - სინგაპური

24 სექტემბერი - იაპონია

8 ოქტომბერი - ყატარი

22 ოქტომბერი - აშშ (ოსტინი)

29 ოქტომბერი - მექსიკა

5 ნოემბერი - ბრაზილია

18 ნოემბერი - აშშ (ლას ვეგასი)

26 ნოემბერი - აბუ დაბი

თეგებიფორმულა 1
0.10265