ზურიკო დავითაშვილმა „ბორდოში“ იდეალურად დაიწყო - სადებიუტო მატჩში გოლი გაიტანა, თანაც გამარჯვების მომტანი.

ფრანგულმა კლუბმა „დიჟონს“ უმასპინძლა და 2:1 დაამარცხა, რაშიც ქართველი შემტევის უდიდესი წვლილია. დავითაშვილი ორი კვირაა ჟირონდელთა რიგებში ვარჯიშობს, მაგრამ აქამდე საფრანგეთში თამაშის უფლება არ ჰქონდა მიღებული, ეს პრობლემა მოგვარდა თუ არა, მთავარმა მწვრთნელმა დავიდ გიონმა ის ძირითად შემადგენლობაში გაამწესა და 90 წუთიც ათამაშა.

ზურიკოს პირველივე ტაიმში შეეძლო გატანა, მაგრამ ჯერ მესამე წუთზე მისი სახიფათო დარტყმა მეკარემ მოიგერია, ხოლო 35-ე წუთზე კარს ძალიან მცირე მანძილით ააცილა ბურთი. თუმცა, 87-წუთზე მაინც შეძლო თავის გამოჩენა, როცა ბურთი მარჯვენა ფლანგზე მიიღო, შუაში შეიწია და ძლიერი დარტყმით ეფექტური გოლი გაიტანა, რითაც საბოლოო ანგარიში დააფიქსირა - 2:1. სხვათა შორის, ზურიკო უმეტესად მარჯვენა ფლანგზე მოქმედებდა და მხოლოდ რამდენიმე წუთით ითამაშა მარცხენა ფლანგზე.

„ბორდომ“ ამ გამარჯვებით 17 ქულა დააგროვა და ამ დროისთვის სატურნირო ცხრილში ლიდერია, მომდევნო ტურში კი 1 ოქტომბერს, სტუმრად „ლავალს“ დაუპირისპირდება.