სერბეთის დედაქალაქ ბელგრადში სტარტი აიღო მსოფლიოს ჩემპიონატმა თავისუფალ ჭიდაობაში, რომლის პირველი საშეჯიბრო დღის შედეგად, საქართველოს 2 ბრინჯაოს მედლის შანსი აქვს.

125 კგ წონით კატეგორიაში გენო პეტრიაშვილმა ინდოელი დინეშ დინეში (4:0) და ამერიკელი ნიკოლას ზილმერი 9:4 დაამარცხა, მაგრამ ნახევარფინალში მონღოლ ლხაგვაგერელ მუნხტურთან 2:4 წააგო და ხვალ ბრინჯაოს მედლისთვის რეპეშაჟის გამარჯვებულს გაეჯიბრება. ამრიგად, სამგზის მსოფლიოს ჩემპიონი ამჯერად ოქროსთვის ვერ იბრძოლებს.

ასევე მაქსიმუმ ბრინჯაოთი მოუწევს დაკმაყოფილება კიდევ ერთ მსოფლიოს ჩემპიონ ზურაბ იაკობიშვილს, რომელმაც 70 კგ წონით კატეგორიაში მონღოლი ტემუულენ ენხტუია 2:1 და თურქი სერვეტ ჩოსკუნი 2:0 დაამარცხა, თუმცა ნახევარფინალში ამერიკელ ზაინ ალენ რეტერფორდთან ვერაფერი გააწყო (0:7) და მასაც ბრინჯაოს მედლისთვის რეპეშაჟის გამარჯვებულთან დაპირისპირება მოუწევს.

უმედლოდ დარჩა 79 კგ წონით კატეგორიაში ვლადიმერ გამყრელიძე, რომელმაც ჩინელი შენგსონ ქსია 11:0 დაამარცხა, თუმცა შემდეგ ბულგარეთის სახელით მოასპარეზე ალი ფაშა უმარფაშაევთან 0:11 დამარცხდა და ვინაიდან მისი მეტოქე ფინალში ვერ გავიდა, რეპეშაჟის შანსი დაკარგა.

86 კგ წონით კატეგორიაში ტარზან მაისურაძე ინდოელი სანჟეტ სანჟეტისა (4:4) და აზერბაიჯანელი აბუბქარ აბარაკოვის (3:1) ძლევის შედეგად მეოთხედფინალამდე მივიდა, მაგრამ იქ სლოვაკ ბორის მაკოევთან 5:6 დამარცხდა. ფინალში სლოვაკი ვერ გავიდა და ქართველმა მედლის შანსი დაკარგა.

აქვე გეტყვით, რომ თავისუფალ ჭიდაობაში 18 სექტემბრამდე მედლებისთვის კიდევ 6 ქართველი მოჭიდავე იბრძოლებს.