ჩემპიონთა ლიგის მეორე ტურის მეორე სათამაშო დღეს რამდენიმე საინტერესო მატჩი გაიმართა, ჩვენთვის ყველაზე საინტერესო კი ხვიჩა კვარაცხელიას „ნაპოლის“ შეხვედრა იყო, რომელზეც უკვე დავწერეთ.

მაინც ვთქვათ: „ნაპოლიმ“ სტუმრად „რეინჯერსი“ 3:0 დაამარცხა და 6 ქულით A ჯგუფში ლიდერია. კვარაცხელიას კარგი მატჩი ჰქონდა და პენალტის მოპოვებაც შეძლო, რითაც ნეაპოლელებმა ანგარიში გახსნეს. რაც შეეხება სხვა მატჩებს:

E ჯგუფში ლონდონის „ჩელსიმ“ ისევ ვერ მოიგო. ზაგრების „დინამოსთან“ მარცხის მერე ინგლისელებმა შინ „ზალცბურგს“ ვერაფერი დააკლეს - 1:1. ამრიგად, ორი ტურის მერე „არისტოკრატებს“ მხოლოდ ქულა აქვთ, ჯგუფს კი 4 ქულით „მილანი“ ლიდერობს, 3 ქულა აქვს „დინამო ზაგრებს“ და 2 – „ზალცბურგს“.

F ჯგუფში მადრიდის „რეალმა“ გერმანული „ლაიფციგი“ მეორე ტაიმში გატეხა და 2:0 იმარჯვა. კარლო ანჩელოტის გუნდს ამ ჯგუფში პრობლემები წესით არ შეექმნება, რადგან ორ ტურში 6 ქულა აქვს და აშკარა ფავორიტია. მძიმედაა „ლაიფციგის“ საქმე, რომელიც უქულოდ ბოლო ადგილზეა. „შახტარი“ 4 ქულით მეორეა, „სელტიკს“ ერთი ქულა აქვს.

G ჯგუფში „მანჩესტერ სიტიმ“ „დორტმუნდი“ ბოლოსკენ გატეხა. არადა, გერმანელები ჯუდ ბელინგემის გოლით იგებდნენ, მაგრამ ჯერ ჯონ სტოუნსმა გაათანაბრა, 84-ე წუთზე კი გამარჯვების ერლინგ ჰოლანდმა გაიტანა. მან თავისი ყოფილი გუნდი დაამწუხარა და „სიტი“ 6 ქულით ჯგუფის ლიდერია. „დორტმუნდს“ 3 ქულა აქვს და ჯგუფში მეორეა. თითო ქულა გააჩნიათ „კოპენჰაგენსა“ და „სევილიას“, რომლებიც დანიაში უგოლოდ დაზავდნენ. დანიის ჩემპიონის რიგებში შეუცვლელად ითამაშა დავით ხოჭოლავამ და საკმაოდ მაღალ დონეზეც. მან Whoscored-ისგან 7.2 ქულა დაიმსახურა, რაც საუკეთესო შეფასება იყო. ქართველი მცველი სანაკრებო პაუზას ძალიან კარგ ფორმაში ხვდება.

და ბოლოს H ჯგუფი, სადაც ორი ტურის შემდეგ ბევრი რამ გამოიკვეთა. პსჟ ჰაიფაში „მაკაბისთან“ აგებდა, მაგრამ მერე ლიონელ მესის, კილიან მბაპესა და ნეიმარის გოლებით 3:1 მოიგო და 6 ქულა დააგროვა. პსჟ-სგან 6 ქულა თუ გასაკვირი არაა, გასაკვირია „ბენფიკასგან“! პორტუგალიურმა გუნდმა მიმდინარე სეზონში 12 მატჩი ჩაატარა და 12-ვე მოიგო! როჯერ შმიდტის გუნდმა ამჯერად ტურინში „იუვენტუსი“ დაამარცხა - 2:1. იტალიელები არკადიუშ მილიკის მეოთხე წუთზე გატანილი გოლით იგებდნენ, მაგრამ ჟოაო მარიომ და დავიდ ნერეშმა ლისაბონელებს მოაგებინეს. ზოგადად, ისტორიულად „იუვეს“ ბენფიკასთან“ ძალიან უჭირს, ერთადერთხელ ჰყავს დამარცხებული, ისიც 30 წლის წინ, მაგრამ ახლა ტურინულ გრანდში კატასტროფული პერიოდია, რადგან მასიმილიანო ალეგრის გუნდმა სეზონში ჩატარებულ 8 მატჩში მხოლოდ ორჯერ იმარჯვა. თუმცა, ეს კიდევ არაფერი: „იუვენტუსს“ ჯგუფში ქულა არ მოუპოვებია და მეორე ადგილოსანს უკვე 6 ქულით ჩამორჩება, რითაც შეიძლება ითქვას, რომ ჯგუფიდან გასვლა ძალიან გაუჭირდება. თუმცა, მაქს ალეგრი ჯერ თანამდებობას მაინც ინარჩუნებს.

„იუვენტუსი“ – „ბენფიკა“ 1:2 (1:1)

გოლები: 1:0 მილიკი (4), 1:1 ჟოაო მარიო (43, პენ), 1:2 ნერეში (55)

„მაკაბი“ - პსჟ 1:3 (1:1)

გოლები: 1:0 ჩერი (24), 1:1 მესი (37), 1:2 მბაპე (69), 1:3 ნეიმარი (88)

„რეინჯერსი“ – „ნაპოლი“ 0:3 (0:0)

გოლები: 0:1 პოლიტანო (68, პენ), 0:2 რასპადორი (85), 0:3 ნდომბელე (90)

„ჩელსი“ – „ზალცბურგი“ 1:1 (0:0)

გოლები: 1:0 სტერლინგი (48), 1:1 ოკაფორი (75)

„კოპენჰაგენი“ – „სევილია“ 0:0 (0:0)

„რეალი“ – „ლაიფციგი“ 2:0 (0:0)

გოლები: 1:0 ვალვერდე (80), 2:0 ასენსიო (90)

„მანჩესტერ სიტი“ – „დორტმუნდი“ 2:1 (0:0)

გოლები: 0:1 ბელინგემი (56), 1:1 სტოუნსი (80), 2:1 ჰოლანდი (84)