ფეხბურთი

1:22 | 1.09.2022 | ნანახია [] - ჯერ

ჰოლანდის ზედიზედ მეორე ჰეთ-თრიქი, ლიდერი "არსენალი" და "ლივერპულის" მოგება 98-ე წუთზე

ინგლისის პრემიერლიგაში ერლინგ ჰოლანდი შეუჩერებელია. ნორვეგიელმა თავდამსხმელმა ზედიზედ მეორე ჰეთ-თრიქი შეასრულა!

„მანჩესტერ სიტიმ“ „ნოტინგემ ფორესტი“ 6:0 გააცამტვერა და ჰოლანდს სამი გოლის გასატანად 38 წუთი დასჭირდა. მას 5 ტურში უკვე 9 გოლი აქვს გატანილი, რითაც პრემიერლიგის რეკორდი დაამყარა. „ქალაქელებმა“ „ფორესტის“ რბევა მეორე ტაიმშიც გააგრძელეს, დუბლი შეასრულა ხულიან ალვარესმა, ერთიც ჟოაო კანსელოს ანგარიშზეა. „მანჩესტერ სიტის“ 13 ქულა აქვს და მეორე ადგილზეა.

პრემიერლიგაში ერთადერთი უდანაკარგო გუნდია - ლონდონის „არსენალი“. მიკელ არტეტას გუნდმა ამჯერად ბირმინგემის „ასტონ ვილა“ დაამარცხა გაბრიელ ჟესუსისა და გაბრიელ მარტინელის გოლებით - 2:1. ამრიგად, „მეთოფეები“ 15 ქულით ერთპიროვნული ლიდერები არიან.

„ლივერპული“ „ბორნმუთთან“ 9:0 მოგების მერე შინ დიდებულ ხასიათზე დაუხვდა „ნიუკასლ იუნაიტედს“, თუმცა ძალიან ახლოს იყო კიდევ ერთხელ ქულების დაკარგვასთან. „კაჭკაჭებმა“ ტაიმი ალექსანდერ ისაკის გოლით მოიგეს, რომელმაც სადებიუტო თამაშში გაიტანა, რასაც 61-ე წუთზე რობერტო ფირმინომ უპასუხა. მსაჯმა თამაშს 5 წუთი დაამატა და უკვე მერვე(!) კომპენსირებული წუთი მიმდინარეობდა, როცა „ლივერპული“ ვერ იგებდა, მაგრამ მხსნელად 20 წლის ფაბიო კარვალიო მოევლინა, რომელმაც გამარჯვების გოლი გაიტანა და „ლივერპულმა“ უმნიშვნელოვანესი 3 ქულა მოიპოვა.

ვერ მოიგო „ტოტენჰემმა“, რომელიც გასვლაზე „ვესტ ჰემს“ დაუზავდა (1:1), თუმცა ანტონიო კონტეს გუნდი 11 ქულით მესამე პოზიციაზეა.

0.10799