ფეხბურთი

0:40 | 19.08.2022 | ნანახია [] - ჯერ

ბუდუ ზივზივაძის გოლი და საგოლე პასი კონფერენს ლიგაზე გერმანულ "კიოლნთან" (+VIDEO)

კონფერენს ლიგის პლეი-ოფში უნგრულმა „ფეჰერვარმა“ გასვლაზე გერმანული „კიოლნი“ 2:1 დაამარცხა და ბუდუ ზივზივაძე მატჩის გმირი იყო - ქართველმა ფორვარდმა „თხების“ წინააღმდეგ გოლი გაიტანა და საგოლე პასიც გააკეთა.

„კიოლნი“ იგებდა, შემდეგ გერმანელები რიცხობრივ უმცირესობაში დარჩნენ, ხოლო 32-ე წუთზე ზივზივაძემ თავური დარტყმით წონასწორობა აღადგინა. მე-40 წუთზე კი ბუდუმ გოლს საგოლე პასი დაუმატა და ასისტენტობა პალკო დარდაის გაუწია. მეორე ნახევარში არაფერი შეცვლილა და „ფეჰერვარს“ საპასუხო მატჩის წინ უპირატესობა აქვს, ასე რომ ჯგუფურ ეტაპთან ახლოსაა.

28 წლის ქართველმა ფორვარდმა ეს სეზონი დიდებულად დაიწყო და ყველა ტურნირზე 8 მატჩში 7 გოლი აქვს მითვლილი. კონკრეტულად კონფერენს ლიგაზე კი საოცარი შედეგი აქვს - 5 მატჩი და 6 გოლი. სხვათა შორის, ამ ტურნირზე მან გატანა ყველა მატჩში მოახერხა და ბომბარდირებში მეორე პოზიციაზეა.

დღეს, ქართველი ლეგიონერების სხვა კლუბებმაც ითამაშეს. პოზნანის „ლეხმა“ ლუქსემბურგული „დუდელანჟი“ 2:0 დაამარცხა. ნიკა კვეკვესკირმა 61-ე წუთიდან ითამაშა, ხოლო გიორგი წიტაიშვილი მოედანზე 66-ე წუთზე გამოჩნდა.

წააგო ბრატისლავის „სლოვანმა“, რომელმაც ბოსნიაში, „ჟრინსკისთან“ ბოლო წუთზე გაშვებული გოლით განიცადა მარცხი - 0:1. გურამ კაშიამ და ჯაბა კანკავამ შეუცვლელად ითამაშეს, გიორგი ჩაკვეტაძემ 66-ე წუთამდე. ვლადიმირ ვაისის გუნდს ჯგუფურ ეტაპზე მოხვედრა თუ უნდა, შინ აუცილებლად გამარჯვება სჭირდება.

ვაკო გვილიას „რაკუვმა“ საკუთარ კედლებში პრაღის „სლავია“ 2:1 დაამარცხა. ქართველმა ნახევარმცველმა შეუცვლელად ითამაშა და პოლონელებმა ჯგუფურ ეტაპზე მოსახვედრად სერიოზული განაცხადი გააკეთეს. გიორგი აბურჯანიამ 61-ე წუთამდე ითამაშა „ალკმაართან“ და მაშინ შეცვალეს, როცა მისი „ჟილ ვისენტე“ 0:1 მარცხდებოდა, საბოლოოდ კი, პორტუგალიელებმა 0:4 წააგეს და უმძიმეს ვითარებაში ჩავარდნენ.

გაგი მარგველაშვილის „შკუპი“ კოსოვოს „ბალკანის“ უგებდა, მაგრამ ორი გოლი გაუშვა და შინ 1:2 დამარცხდა. ქართველმა მცველმა შეუცვლელად ითამაშა. გიორგი ხარაიშვილს არ უთამაშია, მის გარეშე კი „ფერენცვაროშმა“ 4:0 გაანადგურა „შემროკ როვერსი“, ხოლო რევაზ ინჯგიას „აპოლონი“ „ოლიმპიაკოსს“ დაუზავდა (1:1). ქართველი განაცხადში არ იყო.

0.097464