საქართველოს ნაკრებისა და „ვოლფსბერგერის“ მცველის ლუკა ლოჩოშვილის „ვერონაში“ ტრანსფერი პრაქტიკულად გადაწყდა და მხოლოდ დროის საკითხია.

ავსტრიული Sky Sport-ი იტყობინება, რომ 24 წლის ქართველმა მცველმა კლუბის ბოლო ვარჯიში გამოტოვა. უცნობია, მიზეზი მცირე ტრავმაა თუ ტრანსფერი, მაგრამ ვარაუდობენ, რომ ფეხბურთელს არაფერი აწუხებს და იტალიაში გადასაბარგებლად ემზადება.

მანამდე „ვოლფსბერგერის“ პრეზიდენტმა დიტმარ რიგლერმა არ დამალა, რომ ინტერესი არსებობს და შემოთავაზებულ თანხაზე უარს ვერ იტყვიან, თუმცა იმედი გამოთქვა, რომ სამშაბათს, „გზირასთან“ კონფერენს ლიგაზე დაგვეხმარებაო.

ლუკას „კრემონეზესაც“ უკავშირებდნენ, მაგრამ ბოლო ცნობებით იტალიელებმა ვენის „რაპიდის“ მცველი ემანუელ აივუ აირჩიეს. მიუხედავად ამისა, ლოჩოშვილი დიდი ალბათობით, მაინც სერია A-ში აღმოჩნდება.

„ვერონამ“ გასული სეზონი მეცხრე ადგილზე დაასრულა, ახალ სეზონს კი 15 აგვისტოს „ნაპოლისთან“ საშინაო მატჩით დაიწყებს. შეგახსენებთ, რომ ლოჩოშვილმა „ვოლფსბერგერში“ 2020 წლიდან დღემდე 71 მატჩში 2 გოლით და 1 საგოლე პასით გამოიჩინა თავი, საქართველოს ნაკრებში კი ორჯერ აქვს ნათამაშები.