სხვა

21:10 | 4.08.2022 | ნანახია [] - ჯერ

ელეინ თომპსონ-ერამ თანამეგობრობის თამაშებზე ოქროს მედალი მოიპოვა

ოლიმპიურმა ჩემპიონმა 100 მეტრზე სპრინტში, იამაიკელმა ელეინ თომპსონ-ერამ დიდი ხნის ოცნება აისრულა - 100 მეტრზე სპრინტში, თანამეგობრობის თამაშების ოქროს მედალსაც დაეუფლა. 30 წლის სპრინტერმა ფინალში დისტანცია 10.95 წამში გაირბინა.

თომპსონ-ერას ოლიმპიადებზე ხუთი ოქროს მედალი აქვს მოპოვებული, მაგრამ აქამდე თანამეგობრობის თამაშების ინდივიდუალურ ოქროს არ ფლობდა. ამჯერადაც თავიდან მდევრის როლში იყო - საუკეთესო სტარტი ბრიტანელ დერილ ნეიტას ჰონდა. მაგრამ საბოლოოდ იამაიკელმა გაიმარჯვა, ნეიტა კი ბრინჯაოს დასჯერდა.

„ძალიან მიხარია. ამ გარბენის უკეთ შესრულებაც შემეძლო, მაგრამ მაინც კმაყოფილი ვარ, რადგან თანამეგობრობის თამაშებზე პირველად დავეუფლე ოქროს მედალს. აქ პირველად 2014 წელს გამოვედი, 2018 წელს 200 მეტრზე მეოთხე ადგილი დავიკავე. ახლა კი ოქრო ავიღე“, - განაცხადა ჩემპიონმა.

იამიკელი ვარსკვლავური სამეულიდან, მან ბირმინგემში ერთადერთმა იასპარეზა. მსოფლიოს ჩემპიონებმა 100 და 200 მეტრზე სპრინტში (შესაბამისად) შელი-ენ ფრეიზერ-პრაისმა და შერიკა ჯეკსონმა თანამეგობრობის თამაშები გამოტოვეს, რადგან ბრილიანტის ლიგაზე არიან ფოკუსირებული. აღსანიშნავია, რომ თომპსონ-ერა მსოფლიო ჩემპიონატზე ბრინჯაოს მედალს დასჯერდა.

აღსანიშნავია, რომ იამაიკელის მთავარ მეტოქეს, ბრიტანელ ნეიტას ნახევარფინალურ გარბენში საუკეთესო დრო - 10.90 წამი ჰქონდა, რაც ფინალშიც გამარჯვების საშუალებას მისცემდა. მაგრამ მისი გამეორება ვეღარ შეძლო. ის ბრინჯაოს დასჯერდა, ვერცხლს კი სენტ ლუსიას ჯულიენ ალფრედი დაეუფლა.

0.154804