მსოფლიოს ორგზის ჩემპიონი, ესპანელი ფერნანდო ალონსო მომავალი სეზონიდან „ალპინს“ დატოვებს და „ასტონ მარტინში“ გადავა, სადაც მსოფლიოს ოთხგზის ჩემპიონის, გერმანელი სებასტიან ფეტელის ადგილს დაიკავებს. ბრიტანული გუნდის განცხადებით, 41 წლის ესპანელთან მრავალწლიანი კონტრაქტი გაფორმდა.

ფეტელმა ახლახანს გამოაცხადა, რომ ფორმულა 1-ში თავის კარიერას ასრულებს. „ალპინში“ ალონსოს ადგილი ვაკანტურად დარჩა და გავრცელებული არაოფიციალური ინფორმაციით, ფრანგული საჯინიბოს ავსტრალიელი სარეზერვო პილოტი, 21 წლის ოსკარ პიასტრი შეცვლის, ვინც გასულ სეზონში, ფორმულა 2-ის ჩემპიონი გახდა.

„ჯერაც მაქვს იმის სურვილი და ამბიცია, რომ წინა რიგებში ვიყო. და ამიტომ, მინდა ისეთი ორგანზაციის წევრობა, რომელიც სწავლობს, ვითარდება და წარმატებას აღწევს. წარმატების ჟინი და რბოლებში მონაწილეობის სურვილი, სპორტში დარჩენის და ამით სიამოვნების მიღების საშუალებას მაძლევს. მე კვლავაც მსურს გამარჯვება და ამიტომ, უნდა გამოვიყენო ყველა შესაძლებლობა, რომლებსაც სწორად ჩავთვლი“, - ამბობს ალონსო.

აღსანიშნავია, რომ მიმდინარე ჩემპიონატში, „ალპინს“ 13 რბოლის შემდეგ, მეოთხე ადგილი უკავია, „ასტონ მარტინი“ კი ბოლოსწინა, მეცხრე ადგილზეა.