„ბარსელონას“ პრეზიდენტმა ჟოან ლაპორტამ კიდევ ერთხელ ისაუბრა ლიონელ მესიზე და აშკარაა, რომ მას არგენტინელი ფეხბურთელის დაბრუნება აქვს განზრახული.

შესაძლოა, ეს წელს არ მოხდეს, მაგრამ მესის პსჟ-სთან კონტრაქტი მომდევნო ზაფხულს ეწურება და არაა გამორიცხული „ბლაუგრანას“ თავისუფალი აგენტის სტატუსით შეუერთდეს.

„ლეოს კარიერა აქ ისე არ დასრულებულა, როგორც ყველას გვინდოდა, ის დამთავრდა ჩვენი ეკონომიკური პრობლემების გამო. ჩვენ მის მიმართ მორალური ვალი გვაქვს: გვინდა კარიერა „ბარსელონას“ მაისურში დაასრულოს და ტაში დავუკრათ. ვგრძნობ თანაპასუხისმგებლობას ამ ფინალისთვის. ვფიქრობ, ეს იყო დროებითი დასასრული და მგონია, რომ ამ მისწრაფებას რეალობად ვაქცევთ.

დე იონგი? ჩვენ ყველაფერს გავაკეთებთ იმისთვის, რომ ის დარჩეს და ვიმედოვნებთ, რომ ფეხბურთელიც ყველაფერს გააკეთებს დასარჩენად. ეს ყველამ უნდა ვეცადოთ. ჩვენ გვაქვს ანაზღაურების ახალი ზღვარი და ეს ყველამ მოთამაშემ უნდა მიიღოს.

ნაგელსმანის სიტყვები ლევანდოვსკის ტრანსფერზე? ამ საკითხზე გარედან ბევრი არაფერია ცნობილი „ბაიერნმა“ იმაზე უნდა იფიქროს, რომ ლევანდოვსკის გაყიდვით დიდი თანხა მიიღო. „ბარსელონა“ კარგად მუშაობს, ყველა მიზნის მისაღწევად კარგადაა დაბალანსებული და კონკურენტუნარიან გუნდს ვქმნით. შესაძლოა სხვებისთვის გამაღიზიანებელია, რომ ამდენ ფეხბურთელს ჩვენთან თამაში სიამოვნებით უნდა“, - თქვა ლაპორტამ.