პოზნანის „ლეხის“ ქართველმა ფეხბურთელმა ნიკა კვეკვესკირმა „დინამო ბათუმთან“ მატჩის წინ პრესკონფერენციაზე ისაუბრა. როგორც გამოცდილმა ნახევარმცველმა აღნიშნა, რთული მატჩი იქნება და მისთვის სამწუხაროა, რომ ქართველების წინააღმდეგ თამაში უწევს.

„ჩვენ უკეთესი გუნდი ვართ, უფრო ხარისხიანი, მაგრამ ეს მხოლოდ ფურცელზე. „სლოვანთან“ მატჩს ვუყურე და „დინამო ბათუმი“ გამარჯვებას იმსახურებდა, უბრალოდ არ გაუმართლა და ძალიან კარგი გუნდია. „დინამოს“ თავისი სტილი აქვს, თამაშის ხედვა და ასეთ გუნდთან ბოლომდე დახარჯვაა საჭირო. იმედი მაქვს, ხვალ ქართული ფეხბურთისთვის კარგი დღე არ იქნება, იმიტომ, რომ ჩვენ გამარჯვება გვინდა (იღიმის).

საქართველოს ყოველთვის ჰყავდა ნიჭიერი ფეხბურთელები და ტექნიკურად ძალიან კარგი მოთამაშეები. ქართული ფეხბურთი სწორ გზაზეა, ფეხბურთის ფედერაცია კარგად მუშაობს, ეროვნულ ნაკრებს კარგი პერიოდი აქვს. სამწუხაროა, რომ ხვალ ქართველების წინააღმდეგ ვთამაშობთ. ორივე გუნდისთვის რთული იქნება. ექსტრაკლასას ჩემპიონატი უფრო მაღალი დონისაა, ვიდრე საქართველოს, რომლის ჩემპიონი „დინამო ბათუმია“. ეს არის გუნდი, რომელსაც დიდი ხანია ერთი მწვრთნელი ჰყავს, შესაბამისად, წლების განმავლობაში ერთნაირი თამაშის ხედვა და ტაქტიკა აქვს“, - თქვა კვეკვესკირმა.

შეგახსენებთ, რომ პოზნანის „ლეხში“, რომელსაც ბოლო სამი მატჩი წაგებული აქვს და ჩემპიონთა ლიგას აზერბაიჯანის ჩემპიონ „ყარაბაღთან“ მარცხით გამოეთიშა, გიორგი წიტაიშვილიც თამაშობს. ხვალინდელი შეხვედრა თბილისის დროით 20:00 საათზე დაიწყება. ამ წყვილში გამარჯვებული მესამე საკვალიფიკაციო ეტაპზე ისლანდიურ "ვიკინგურსა" და უელსურ "ნიუ საინტს" შორის საუკეთესოს შეხვდება.