ძიუდო

0:14 | 18.07.2022 | ნანახია [] - ჯერ

ღვინიაშვილი ჩემპიონია - ძიუდოისტების 5 მედალი ზაგრების გრან პრიდან

საქართველომ ზაგრების გრან პრიზე 5 მედალი მოიპოვა. შეჯიბრის ბოლო დღეს ბექა ღვინიაშვილი ოქროს, ხოლო ილია სულამანიძე ვერცხლის მედალს დაუფლა. ამ შედეგით საქართველო გუნდურ ჩათვლაში მეხუთე ადგილზე გავიდა.

90 კგ წონით კატეგორიაში ბექა ღვინიაშვილმა ჩეხი დავიდ კლამერტი, ბერძენი თეოდოროს ცელიდისი და ფრანგი ფრანსის დამიე დაამარცხა, ხოლო ნახევარფინალში იაპონელ კენტა ნაგასავას გაეჯიბრა, რომელსაც აჯობა, ფინალში კი ბრაზილიელ რაფაელ მაჩედოს გაეჯიბრა, რომელიც იპონით დაამარცხა და ოქროს მედალს დაეუფლა.

100 კგ წონით კატეგორიაში ილია სულამანიძე ასპარეზობაში მესამე წრიდან ჩაერთო, რადგან მისი პირველი მეტოქე ხორვატი მარკო კუმრიჩი ტატამიზე არ გამოცხადდა. ილიამ კი, ჯერ ესტონელი გრიგორი მინასკინი და მერე ყაზახი ნურლიხან შარხანი დაამარცხა, შედეგად ნახევარფინალში გავიდა, სადაც პოლონელ პიოტრ კუჩერას შეხვდა, რომელსაც აჯობა და ფინალში მისი მეტოქე ნიდერლანდელ მიხაელ კორელს დაუპირისპირდა, რომელმაც ნახევარფინალში ესპანეთის სახელით მოასპარეზე ნიკოლოზ შერაზადიშვილი დაამარცხა. კორელმა ფინალში სულამანიძეც დაამარცხა და ქართველი ვერცლს დასჯერდა.

+100 კგ წონით კატეგორიაში გელა ზაალიშვილი მეორე წრიდან ჩაერთო და ნახევარფინალამდე პოლონელი ვოიცეხ კორდიალიკი, ყაზახი ადილ ორაზბაიევი და ჩეხი ლუკაშ კრპალეკი დაამარცხა, მაგრამ ნახევარფინალში ნიდერლანდელ იურ სპიკერსთან წააგო და ბრინჯაოს მედლისთვის აზერბაიჯანის სახელით მოასპარეზე უშანგი კოკაურს შეხვდა, რომელთანაც დამარცხდა და უმედლოდ დარჩა.

დღესვე ქალთა შორის სოფიო სომხიშვილს ბრინჯაოს მედლის შანსი აქვს. მან ხორვატი ტინა რადიჩი დაამარცხა, შემდეგ ფრანგ ლეა ფონტენთან წააგო, მაგრამ რეპეშაჟში თურქ სებილ აკბულუტს აჯობა და ბრინჯაოს მედლისთვის გავა ტატამიზე, მეტოქედ კი მონღოლი ადიასურენ ამარსაიხანი ჰყავდა, მაგრამ წააგო და მედალი ვერ მოიპოვა.

შეგახსენებთ, რომ საქართველო ზაგრებში 10 ძიუდოისტით წარსდგა და 5 მედალი დაისაკუთრა. ღვინიაშვილამდე და სულამანიძემდე ეთერ ლიპარტელიანი ვერცხლს, ხოლო გიორგი სარდალაშვილი და ტატო გრიგალაშვილი ბრინჯაოს მედლებს დაეუფლნენ.

ტატო ნიკურაძე

სარეკლამო ადგილი - 23
250 x 500
სარეკლამო ადგილი - 14
120 x 600
0.121382