„დინამო ბათუმის“ პრეზიდენტმა არჩილ ბერიძემ კლუბის გულშემატკივრებს მიმართა და განაცხადა, რომ ისინი უკან დახევას და დანებებას არ აპირებენ.
„მადლობა ყველას მხარდაჭერისთვის, გამხნევებისთვის და სამაგალითო ქომაგობისთვის. პირველ რიგში მადლობა ჩვენს ერთგულ გულშემატკივარს, თითოეულ ბათუმელს, მუდამ ვამბობ და ვიტყვი: ეს გუნდი თქვენია და თქვენ საუკეთესოები ხართ!
მადლობა ფეხბურთელებს თავდაუზოგავი შრომისთვის, სამწვრთნელო შტაბს, ტექნიკურ პერსონალს და ყველას ვინც დინამო ბათუმის წარმატებისთვის ძალ- ღონეს არ იშურებს
გასული 5 წლის მანძილზე ბევრი გამარჯვება ვიზეიმეთ და იმედგაცრუებებიც არ გვაკლდა, მაგრამ უკან არასდროს დაგვიხევია, არც ახლა ვაპირებთ დანებებას და ჩვენს ოცნებებზე უარის თქმას.
რამდენი მცდელობაც არ უნდა დაგვჭირდეს, დინამო ბათუმი აუცილებლად ითამაშებს ევროთასებზე და ჩვენ ისევ დავწერთ ამ კლუბის ახალ ისტორიას“, - ციტირებს „დინამო ბათუმის“ ვებგვერდი ბერიძის სიტყვებს.
შეგახსენებთ, რომ „დინამო ბათუმი“ კონფერენს ლიგაზე გადაერთო, სადაც პოლონეთის ჩემპიონ პოზნანის „ლეხს“ დაუპირისპირდება.
