ავსტრიის დიდი პრიზის საკვალიფიკაციო რბოლა მაქს ფერსტაპენმა მოიგო, „მერსედესის“ ორივე პილოტმა კი ასპარეზობა რბოლის მესამე ნაწილში, ავარიით დაასრულეს. ამის გამო, ლუის ჰამილტონი მე-10 ადგილზე ჩარჩა, ჯორჯ რასელს კი უკვე მოსწრებული ჰქონდა სწრაფი წრის დაფიქსირება, რითაც მე-5 ადგილი ერგო.
რასელის ავარიის შემდეგ, რბოლა მეორედ შეწყდა და მრბოლებს ორ წუთზე ოდნავ მეტი ჰქონდათ დარჩენილი იმისთვის, რომ პოულის მოპოვება ეცადათ. 24 წლის ჰოლანდიელმა, როგორც სჩვევია, სამუშაოს ყველაზე უკეთ გაართვა თავი და საუკეთესო შედეგი აჩვენა. ის მანამდეც ყველაზე სწრაფი იყო, მაგრამ რომ არა ბოლო წრე, პოულს „ფერარის“ შარლ ლეკლერს დაუთმობდა, ვისაც საბოლოოდ, სულ რაღაც, 0.029 წამით აჯობა. ფერსტაპენს 0.082 წამით ჩამორჩა „ფერარის“ კიდევ ერთი პილოტი, კარლოს საინსი.
მეოთხე დრო სერხიო პერესს ჰქონდა, მაგრამ რბოლის მეორე ნაწილში ტრეკის ლიმიტის დარღვევების გამო, მისი საუკეთესო დროები გაუქმდა და მექსიკელმა მე-13 ადგილზე გადაინაცვლა. მიზეზი ისაა, რომ დარღვევის დროულად დაფიქსირების შემთხვევაში, „რედ ბულის“ პილოტი კვალიფიკაციის მესამე ნაწილში ასპარეზობის უფლებას ვერ მოიპოვებდა.
„მერსედესი“ ავსტრიაშიც კარგად გამოიყურებოდა, მაგრამ პილოტების შეცდომების გამო, მანქანის გაუმჯობესების მატერიალიზება ვერ მოხერხდა. პერესის ჩამოქვეითების გამო, მეოთხეზე რასელმა გადაინაცვლა, მეხუთე პოზიცია კი ესტებან ოკონს ერგო. ათეულში ასევე არიან „ჰაასის“ პილოტები, კევინ მაგნუსენი და მიკ შუმახერი, ასევე ოკონის თანაგუნდელი ფერნანდო ალონსო.
სპრინტ რბოლა 24-წრიანი იქნება და მასზე ნაჩვენები შედეგების მიხედვით, პილოტები კვირის რბოლის სტარტზე განლაგდებიან.
ავსტრიის დიდი პრიზი
კვალიფიკაცია
- მაქს ფერსტაპენი (ჰოლანდია, რედ ბული) 1'04.984
- შარლ ლეკლერი (მონაკო, ფერარი) 0.029
- კარლოს საინსი (ესპანეთი, ფერარი) 0.082
- სერხიო პერესი (მექსიკა, რედ ბული) 0.420
- ჯორჯ რასელი (ბრიტანეთი, მერსედესი) 0.447
- ესტებან ოკონი (საფრანგეთი, ალპინი) 0.742
- კევინ მაგნუსენი (დანია, ჰაასი) 0.895
- მიკ შუმახერი (გერმანია, ჰაასი) 1.027
- ფერნანდო ალონსო (ესპანეთი, ალპინი) 1.119
- ლუის ჰამილტონი (ბრიტანეთი, მერსედესი) 8.167
- პიერ გასლი (საფრანგეთი, ალფატაური) 1.176
- ალექს ელბონი (ტაილანდი, უილიამსი) 1.246
- იუკი ცუნოდა (იაპონია, ალფატაური) 1.867
- ლანდო ნორისი (ბრიტანეთი, მაკლარენი) 20.863
- დანიელ რიკარდო (ავსტრალია, მაკლარენი) 1.629
- ლანს სტროლი (კანადა, ასტონ მარტინი) 1.863
- გუანიუ ჟოუ (ჩინეთი, ალფა რომეო) 1.917
- ნიკოლას ლატიფი (კანადა, უილიამსი) 2.019
- სებასტიან ფეტელი (გერმანია, ასტონ მარტინი) 2.099
- ვალტერი ბოტასი (ფინეთი, ალფა რომეო) 1.335
