ნიკოლოზ ბასილაშვილი, რომელმაც ერთეულთა თანრიგში ორი ეტაპი გადალახა, წყვილთა შორისაც წარმატებით ასპარეზობს და პირველი ეტაპი დაძლია.

ნიკოლოზმა და რადუ ალბოტმა სანდერ არენდსისა და ქუენტინ ალისის დუეტი ხუთსეტიან ბრძოლაში დაამარცხეს - 7:5, 7:6, 4:7, 1:6, 6:4. ამრიგად, ქართველი ჩოგბურთელი წყვილთა თანრიგშიც 1/16 ფინალში ითამაშებს.

მანამდე, ბასილაშვილს 1/16-ფინალური შეხვედრა ერთეულებში ელოდება და პარასკევს, ნიდერლანდელ ტიმ ვან რეიტჰოვენს დაუპირისპირდება.

დღესვე წყვილთა თანრიგში ითამაშა ოქსანა კალაშნიკოვამ, რომელიც კატარჟინა პიტერთან იყო შეწყვილებული, მაგრამ 1/32 ფინალში ისინი მარი ბოუზკოვასა და ტერეზა მიჰალიკოვას დუეტთან დაძაბულ ბრძოლაში დამარცხდნენ.

შეხვედრა 2 საათსა და 37 წუთს გაგრძელდა და პირველი სეტი კალაშნიკოვამ და მისმა მეწყვილემ 6:3 მოიგეს, მაგრამ მეორე სეტი ტაიბრეიკზე (5:7), წააგეს, ხოლო გადამწყვეტი სეტი 4:6 დათმეს და უიმბლდონს გამოეთიშნენ.

წყვილთა თანრიგის მეორე წრეში გავიდა საქართველოს სახელით მოასპარეზე ნათელა ძალამიძე, რომელმაც ალექსანდრა კრუნიჩთან ერთად ანა-ლენა ფრიედსამისა და ან ლის წყვილი 6:3, 7:5 დაამარცხა. აღსანიშნავია, რომ ნათელა ძალამიძემ საქართველოს სახელით პირველად იასპარეზა.