„დინამო თბილისის“ მთავარმა მწვრთნელმა გიორგი ჭიაბრიშვილმა „ტორპედოსთან“ მატჩის (5:1) შემდეგ კომენტარი გააკეთა. მისი თქმით, ფეხბურთელებს ყველაფერი გამოუვიდათ და იმედოვნებს, რომ ასე გააგრძელებენ.

„კარგი თამაში იყო. „ტორპედოსთან“ თამაში ყოველთვის რთულია, თან, როდესაც მწვრთნელი კახა ჩხეტიანია და ძალიან მადლიერი ვარ ჩემი ფეხბურთელების, რომ ამდენი შეძლეს. კარგად ითამაშეს, თითქმის ყველაფერი გამოუვიდათ და ვიმედოვნებ, რომ მომავალშიც ასე გაგრძელდება“, - თქვა ჭიაბრიშვილმა.

შეგახსენებთ, რომ „დინამო თბილისმა“ გიორგი ჭიაბრიშვილის ხელმძღვანელობით მეორე მატჩი ჩაატარა და ჯერ „გაგრას“ 5:0 მოუგო, მერე კი „ტორპედოს“ – 5:1. „დინამო“ 19 ტურის შემდეგ მეორე ადგილზეა და ლიდერ „დინამო ბათუმს“ 6 ქულით ჩამორჩება.