ფეხბურთი

20:10 | 22.06.2022 | ნანახია [] - ჯერ

კანი: "ლევანდოვსკის ჩვენთან კონტრაქტი აქვს და შეკრების პირველივე დღეს ბაზაზე ველოდებით"

მიუნხენის „ბაიერნის“ აღმასრულებელმა დირექტორმა ოლივერ კანმა რობერტ ლევანდოვსკიზე ისაუბრა და კიდევ ერთხელ დააფიქსირა კლუბის ურყევი პოზიცია - „ბაიერნი“ პოლონელის გაყიდვას არ აპირებს.

ლევანდოვსკის გუნდის დატოვება ამ ზაფხულს სურს და კონტრაქტის განახლებაზე უარი თქვა, მიუნხენელები კი მიუხედავად იმისა, რომ გაისად მას უფასოდ დაკარგავენ, ახლა არ აპირებენ რობერტის გასხვისებას.

„ლევანდოვსკის 2023 წლამდე აქვს კონტრაქტი და პრესეზონის პირველივე დღეს აქ ველოდებით. სიტუაცია არ შეცვლილა, რობერტს ჩვენთან კონტრაქტი აკავშირებს კიდევ ერთი წლით და ბედნიერები ვიქნებით, როდესაც შეკრებაზე შემოგვიერთდება“, - თქვა კანმა.

შეგახსენებთ, რომ რობერტ ლევანდოვსკი „ბაიერნში“ 2014 წლიდან თამაშობს. გერმანულმა გრანდმა ის „დორტმუნდიდან“ თავისუფალი აგენტის სტატუსით დაიმატა.

0.119155