საფრანგეთის ღია პირველობის ჩემპიონი, ჩეხი ბარბორა კრეიჩიკოვა როლან გაროსს პირველივე წრეში გამოეთიშა. ის ფრანგ დაიანე პარისთან 6-1, 2-6. 3-6 დამარცხდა. მის თამაშზე უარყოფითად აისახა ხანგრძლივი პაუზა, რომელიც იდაყვის ტრავმით იყო გამოწვეული.

კრეიჩიკოვამ როლან გაროსამდე ბოლოს თებერვალში, დოჰას ტურნირზე ითამაშა. დიდი ხნის უთამაშებლობის მიუხედავად, მეორე ნომრად განეთესილმა ჩეხმა პირველი სეტი იოლად მოიგო. უფრო მეტიც, მეორე სეტიც ბრეიკით დაიწყო და 2-0 დაწინაურდა.
მაგრამ აქედან მოყოლებული, ჩემპიონმა შეცდომებს უხშირა, რითაც თავის 19 წლის მეტოქეს, ვისაც მანამდე ტოპ ათეულის ჩოგბურთელთან არასდროს უთამაშია, უპირატესობის მოპოვების საშუალება მისცა.

„მეორე სეტში პირველი ორი გეიმის მოგების შემდეგ, თითქოს კედელს შევასკდი. ძალა გამომელია. ალბათ იმიტომ, რომ დიდხანს არ მითამაშია. როგორც წესი, შეხვედრა ვარჯიშისგან ძირეულად განსხვავებულია. მე ვვარჯიშობდი, მაგრამ ეს საკმარისი არ აღმოჩნდა“, - განაცხადა კრეიჩიკოვამ.

ჩეხის თქმით, ტკივილი არ აწუხებს, მაგრამ თამაშის ტემპს ვერ გაუძლო. ის ამბობს, რომ ტრავმის ქირურგული ჩარევით მკურნალობის შესაძლებლობაც ჰქონდა, მაგრამ ამაზე უარი თქვა, რადგან სწრაფად გამოჯანმრთელების იმედი ჰქონდა. მაგრამ პირიქით მოხდა.