ნიკოლოზ ბასილაშვილმა საფრანგეთის ღია პირველობაზე წარმატებული სტარტი აიღო და 1/64 ფინალში ამერიკელი მაქსიმ კრესი დაამარცხა.

რეიტინგის 24-ე ნომერ ქართველ ჩოგბურთელს 62-ე ჩოგანთან იოლი თამაში არ ჰქონია და შეხვედრა ზუსტად 3 საათისა და 22 წუთის განმავლობაში გაგრძელდა. პირველი ორი სეტი ამერიკელმა მოიგო, 6:3 და 6:2, შედეგად, ნიკოლოზი ურთულეს მდგომარეობაში იყო. თუმცა, მან მობილიზება მოახერხა და ყველაფერი შეატრიალა.

მესამე სეტში ნიკოლოზმა მეტოქის მატჩბოლიც მოიგერია და შემდეგ ყველაფერი სათავისოდ შეცვალა. მესამე სეტი ქართველმა ტაიბრეიკზე 7:6 (10:8) მოიგო და თამაშში დაბრუნდა, ხოლო მეოთხე და მეხუთე სეტში ერთნაირი ანგარიშით 6:4, 6:4 იმარჯვა.

აღსანიშნავია, რომ ბასილაშვილმა მთელი თამაშის განმავლობაში მხოლოდ ორი ბრეიკი გაახერხა - ერთი მეოთხე სეტში, როცა ანგარიში 4:4 იყო და ერთიც ბოლო სეტში, 3:3-ზე, რამაც ორივე სეტის ბედი გადაწყვიტა. თავის მხრივ, მისი ჩაწოდება ნიკოლოზმა მხოლოდ სამჯერ დათმო, პირველ და მეორე სეტებში.

ქართველმა ჩოგბურთელმა 5 ეისი შეასრულა და 7 ორმაგი შეცდომა დაუშვა, ხოლო ამერიკელ ჩოგბურთელს 42(!) ეისი ჰქონდა, თუმცა, 19-ჯერ ორმაგი შეცდომაც დაუშვა.

აქვე გეტყვით, რომ ნიკოლოზ ბასილაშვილი როლან გაროსის 1/16 ფინალში მაკენზი მაკდონალდსს დაუპირისპირდება, რომელმაც ფრანკო აგამენონე 3:1 დაამარცხა.

ნიკოლოზ ბასილაშვილი - მაქსიმ კრესი 3:2 (3:6, 2:6, 7:6, 6:4, 6:4)