„ლივერპულის“ თავდამსხმელი დივოკ ორიგი კარიერას „მილანში“ გააგრძელებს. ბელგიელი ფეხბურთელი ჩემპიონთა ლიგის ფინალის შემდეგ სამედიცინო შემოწმებას გაივლის და იტალიურ კლუბთან კონტრაქტს გააფორმებს.

ორიგი რომ „ლივერპულს“ ტოვებს, დღეს იურგენ კლოპმაც დაადასტურა და თქვა, რომ ის სამუდამოდ იქნება „ლივერპულის“ ლეგენდა.

„ველი, რომ დივოკს განსაკუთრებულად დავემშვიდობებით. ის არის და სამუდამოდ იქნება „ლივერპულის“ ლეგენდა. ერთ-ერთი ყველაზე მნიშვნელოვანი მოთამაშე, რომელიც ოდესმე მყოლია. ის ხშირად არ თამაშობდა, მაგრამ ჩემთვის მასთან მუშაობა სასიამოვნო იყო. სადაც არ უნდა წავიდეს, აუცილებლად იქნება წარმატებული. რთული იქნება მისი წასვლა, რადგან განსაკუთრებული ფეხბურთელი და ბიჭია“, - თქვა კლოპმა.

შეგახსენებთ, რომ დივოკ ორიგი „ლივერპულში“ 2015 წელს „ლილიდან“ გადავიდა და 175 შეხვედრაში თავი 41 გოლით გამოიჩინა.