„პარი სენ ჟერმენმა“ ჯანლუიჯი დონარუმასა და კეილორ ნავასს შორის არჩევანი გააკეთა. როგორც ცნობილი ინსაიდერი ფაბრიციო რომანო წერს, მომდევნო სეზონში პარიზელთა მთავარი მეკარე იტალიელი ფეხბურთელი იქნება.

დონარუმამ ორი დღის წინ ინტერვიუში თქვა, რომ პსჟ-ში რჩება, მაგრამ კლუბს მასსა და ნავასს შორის არჩევანის გაკეთება მოუწევს, რადგან რაც მიმდინარე სეზონში ხდებოდა, ორივე მეკარისთვის რთული იყო.

მოგეხსენებათ, პსჟ-ს კარს ხან დონარუმა იცავდა, ხან - ნავასი, რის გამოც ორივე კიპერი უკმაყოფილო გახლდათ. როგორც ჩანს, ფრანგებმა არჩევანი გააკეთეს და აქცენტს ახალგაზრდა იტალიელზე გააკეთებენ, ხოლო ნავასის გაყიდვაზე მუშაობა უკვე დაწყებულია.

შეგახსენებთ, რომ მიმდინარე სეზონში კეილორ ნავასმა 23 მატჩი ჩაატარა, 21 გოლი გაუშვა და ცხრაჯერ კარი მშრალად შეინახა, ხოლო დონარუმამ 22 შეხვედრაში 20 გოლი გაუშვა და რვაჯერ კარის მშრალად შენახვა შეძლო.