ტუნისელი ონს ჟაბური, თავის კარიერაში ყველაზე გამორჩეულ შეხვედრას მადრიდში გამართავს - ის პირველად ითამაშებს WTA 1000-ის სერიის ტურნირის, მადრიდის ღია პირველობის ფინალში. ეს მას შემდეგ გადაწყდა, რაც ნახევარფინალურ შეხვედრაში, რუსი ეკატერინა ალექსანდროვა 6-2, 6-3 დაამარცხა.

ფინალის გზაზე, ჟაბურმა შვეიცარიელი ოლიმპიური ჩემპიონი ბელინდა ბენჩიჩი და მსოფლიოს ყოფილი პირველი ჩოგანი, რუმინელი სიმონა ჰალეპი დაამარცხა. რაც შეეხება ალექსანდროვას, ტუნისელისთვის ის უხერხული მეტოქეა - ამ ორი ჩოგბურთელის წინა შვიდ შეხვედრაში, მას მხოლოდ ერთი მოგება ჰქონდა.

„ძალიან ემოციური შეხვედრა იყო. ვინც არ იცით, ვეტყვი, რომ მასთან შეხვედრებში 1-6-ზე მქონდა. ამიტომ, ეს მენტალურად რთული შეხვედრა იყო. და ბედნიერი ვარ, რომ გამარჯვება მოვიპოვე. კარგად ვითამაშე. მზად ვიყავი იმისთვის, რომ ხელსაყრელი მომენტები გამომეყენებინა. და იმედი მაქვს, რომ ფინალშიც ამ დონეზე ვითამაშებ“, - განაცხადა ჟაბურმა, ვინც პირველი არაბი ჩოგბურთელია, რომელმაც რეიტინგის ათეულში შეაღწია.

ჟაბურს ფინალში ამერიკელი ჯესიკა პეგულა დაუპირისპირდება, ვინც შვეიცარიელი ცაცია ჯილ ტაიხმანი 6-3, 6-4 დაამარცხა.