ინგლისური „მანჩესტერ სიტის“ მთავარმა მწვრთნელმა პეპ გვარდიოლამ მადრიდის „რეალთან“ მატჩის წინ კომენტარი გააკეთა. ესპანელი სპეციალისტის განცხადებით, მისმა გუნდმა იმაზე უკეთ უნდა ითამაშოს, ვიდრე ერთი კვირის წინ პირველ შეხვედრაში ითამაშა.

„ორი კარგი გუნდის თამაში იქნება, ეს ერთი კვირის წინ ვნახეთ. ისინი ესპანეთში ჩემპიონები არიან, ჩვენ ვცდილობთ ინგლისის ჩემპიონები გავხდეთ. ერთი კვირის წინ ვთქვი, რომ ნახევარფინალში იმისთვის ვართ, რომ ზედიზედ მეორე ფინალი ვითამაშოთ. ვეცდებით, იმაზე უკეთ ვითამაშოთ, ვიდრე პირველ შეხვედრაში.

პირველი მატჩი მშვენიერი, ღია თამაში იყო. ამას ის ფაქტიც ადასტურებს, რომ გუნდებმა 7 გოლი გაიტანეს. შეგვეძლო უკეთესი ანგარიშით მოგება, მაგრამ შეიძლებოდა, უფრო უარესადაც დასრულებულიყო შეხვედრა. კარგით თუ ცუდით, ყოველთვის ვიცოდით, რომ ყველაფერი ორ შეხვედრაში გადაწყდებოდა. უკეთ უნდა ვითამაშოთ, ვიდრე მანჩესტერში. არავინ იცის რა მოხდება, მაგრამ უბრალოდ, წარმოუდგენლად კარგად უნდა ვითამაშოთ და მოვიგოთ“, - თქვა გვარდიოლამ.

შეგახსენებთ, რომ მადრიდის „რეალისა“ და „მანჩესტერ სიტის“ შეხვედრა 4 მაისს, თბილისის დროით 23:00 საათზე გაიმართება.