NBA-ს პლეი ოფის მეოთხედფინალში გასული 7 გუნდის ვინაობა ცნობილია: „მაიამი ჰიტს“, “ბოსტონ სელტიკს“, „მილუოკი ბაქსს“ და „გოლდენ სტეიტს“ – „ფილადელფია სიქსერსი“, „ფინიქს სანსი“ და „დალას მავერიკსი“ შეუერთდნენ.

დღეს გამართული 3 შეხვედრიდან ყველაზე დიდი ანგარიშით „ფილანდელფიამ“ იმარჯვა. დოკ რივერსის გუნდი "ტორონტო რეპტორსს" პირველ ტაიმში ტოლსწორად ეთამაშა, თუმცა, მესამე და მეოთხე პერიოდებში ჯერ 20, შემდეგ კი 14 ქულით აჯობა და საბოლოოდ 35-ქულიანი სხვაობით 132:97 დაამარცხა. სერია კი 4:2ზე დასრულდა.

ეს გამარჯვება დიდწილად ჯოელ ემბიდის დამსახურებაა - კამერუნელმა ცენტრმა 33 ქულით, 10 მოხსნით, 1 პასით, 2 ჩაჭრითა და 3 დაფარებით ორმაგი დუბლი გაიფორმა. მან 18-დან 12 ბურთი ზუსტად ისროლა. ცუდი შედეგი ჰქონდა სამქულიანებში - 28 წლის კალათბურთელმა შორი დისტანციიდან 4-ჯერ ისროლა და ვერცერთი ჩააგდო. სამაგიეროდ 18-დან 12 ორქულიანი და 10-დან 9 საჯარიმო მიითვალა. +- მაჩვენებლით კი 3 თანაგუნდელს: ტაირის მაქსს (+32), ჯეიმს ჰარდენს (+38) და ტობიას ჰარისს (+29) ჩამორჩა.

ტაირისმა „ფილას“ 25 ქულა, 3 მოხსნა და 8 დაფარება მოუტანა. მორიგი კარგი მატჩი ჩაატარა ჰარდენმაც. ამერიკელმა მცველმა ორმაგი დუბლი შეასრულა და მის ანგარიშზე 22 ქულასთან ერთად - 6 მოხსნა და 15(!) პასი იყო. რაც შეეხება ჰარისს, მან19 ქულა, 11 მოხსნა და 2 შედეგიანი გადაცემა დააგროვა.

კანადელებს ტრავმის გამო გუნდის ერთ-ერთი ლიდერი და ყველა ვარსკვლავის მცველი ფრედ ვანვლიტი აკლდათ, რომელმაც ბოლო 2 მატჩი გამოტოვა. ყველაზე შედეგიანი კი კრის ბუჩერი იყო, რომელმაც 25 ქულა და 10 მოხსნა გაახერხა. 24 ქულა, 7 მოხსნა და 7 პასი ჰქონდა პასკალ სიაკამს.

"ფილადელფია" "მაიამი ჰიტს" შეხვდება. ამ წყვილის პირველი მატჩი 3 მაისს გაიმართება. "ტორონტო რეპტორსი" კი 2015 წლის შემდეგ პლეი ოფის პირველი ეტაპიდან პირველად გამოვარდა. მაშინ "ვაშინგტონ ვიზარდის" წინააღმდეგ დამარცხდნენ.