ესპანეთის ლიგა ენდესას 30-ე ტურში გიორგი შერმადინის „ლენოვო ტენერიფე“ „ბარსელონას“ სტუმრად დაუპირისპირდა და დაძაბულ ბრძოლაში 65:69 დამარცხდა. კანარიელებმა ლიდერს ღირსეული წინააღმდეგობა გაუწიეს და ბოლო მომენტამდე ინარჩუნებდნენ გამარჯვების შანსს.

ქართველ ცენტრს უბრალოდ სუპერთამაში ჰქონდა. გიორგიმ 24:50 წუთში 27 ქულა(!), 5 მოხსნა და 1 დაფარება მიითვალა. მან 12-დან 11 ორქულიანი და 5-დან 5 საჯარიმო ჩააგდო, შედეგად მისი მარგი ქმედების კოეფიციენტი 37-ს გაუტოლდა.

ცხადია, შერმადინი ორივე გუნდში საუკეთესო იყო, როგორც მარგი ქმედების კოეფიციენტით, ისე ქულების რაოდენობით. სხვა თუ არაფერი, ეს მაინც მიანიშნებს ქართველის შესანიშნავ თამაშზე - „ტენერიფემ“ სულ 65 ქულა დააგროვა და აქედან 27 იყო გიორგის ანგარიშზე. შერმადინის შემდეგ ყველაზე შედეგიანი ბარსელონელი ბრენდონ დევისი იყო, სულ რაღაც 13 ქულით.

„ლენოვო ტენერიფე“ 19 მოგებით და 11 წაგებით სატურნირო ცხრილში მეხუთე ადგილზეა და მომდევნო შეხვედრას 27 აპრილს, სტუმრად „ბილბაოსთან“ გამართავს.