ჭიდაობა

20:35 | 2.04.2022 | ნანახია [] - ჯერ

შმაგი და გელა ბოლქვაძეები ევროპის ჩემპიონატის ფინალში გავიდნენ

უნგრეთის დედაქალაქ ბუდაპეშტში გრძელდება ევროპის ჩემპიონატი ბერძნულ-რომაულ ჭიდაობაში. შმაგი ბოლქვაძე და გელა ბოლქვაძე ფინალში გავიდნენ.

72 კგ წონით კატეგორიაში შმაგი ბოლქვაძემ სლოვაკი ლეოს დრმოლა (8:0) და ლიეტუველი კრისტუპას სლეივა (5:2) დაამარცხა, ხოლო ნახევარფინალში აზერბაიჯანელ ულვი განიზადეს გაეჯიბრა, რომელიც დაამარცხა და ფინალში 3 აპრილს იჭიდავებს.

82 კგ წონით კატეგორიაში გელა ბოლქვაძემ უკრაინელი იაროსლავ ფილჩაკოვი 4:1 და თურქი ბურჰან აკბუკადი (5:5) დაამარცხა, ნახევარფინალში მისი მეტოქე გერმანელი პასკალ ეისელე იყო, რომლის წინააღმდეგ იმარჯვა და ოქროს მედლისთვის იბრძოლებს.

60 კგ წონით კატეგორიაში ფრიდონ აბულაძემ პირველ წრეში ლიეტუველ იუსტას პეტრავიჩუსს 6:5 მოუგო, შემდეგ კი 2:3 დამარცხდა სომეხ გევორგ ღარიბიანთან, რომელიც ფინალში ვერ გავიდა და ქართველი უმედლოდ დარჩა.

72 კგ წონით კატეგორიაში რამაზ ზოიძემ შვეიცარიელ ანდრეას ვეტშს 9:0 მოუგო, თუმცა მეოთხედფინალში უნგრელ კრისტიან ვანჩშასთან 2:10 წააგო და ოქროს მედლისთვის ბრძოლა შეწყვიტა, მაგრამ რეპეშაჟში გადაინაცვლა და ბრინჯაოსთვის იბრძოლებს.

97 კგ წონით კატეგორიაში ასპარეზობას საკვალიფიკაციო ეტაპზე გამოეთიშა რევაზ ნადარეიშვილი, რომელმაც შვედ ალეკსანდარ სტიეპანეტიჩთან მარცხი განიცადა, თავის მხრივ, შვედი ფინალში ვერ გავიდა და ქართველი რეპეშაჟს მიღმა აღმოჩნდა.

შეგახსენებთ, მანამდე ევროპის ჩემპიონატი თავისუფალ ჭიდაობაში გაიმართა, რომელშიც საქართველოს ნაკრებმა 6 მედალი მოიპოვა - 1 ოქრო (ზურაბ იაკობიშვილი), 1 ვერცხლი (გენო პეტრიაშვილი) და 4 ბრინჯაო (ბექა ბუჯიაშვილი, გიორგი სულავა, ვლადიმერ გამყრელიძე, მირიან მაისურაძე).

0.114626