ეკო გორგოძემ მაიამის ღია პირველობაზე საკვალიფიკაციო ბარიერი დაძლია, მაგრამ ძირითად ბადეში პირველივე წრეში დამარცხდა.

ქართველი ჩოგბურთელი, რომელიც რეიტინგში 123-ე ნომერია, 51-ე ნომერ, უკრაინელ ანელინა კალინინას დაუპირისპირდა და დაძაბულ ბრძოლაში დამარცხდა - 2:6, 6:3, 3:6. შეხვედრა 2 საათსა და 14 წუთს გაგრძელდა. აღსანიშნავია, რომ მეორე სეტს, რომელიც ეკომ 6:3 მოიგო, 1:3-ს აგებდა, თუმცა, ზედიზედ 5 გეიმში აჯობა მეტოქეს. საინტერესო იყო მესამე, გადამწყვეტი სეტიც, რომლის ბოლო 5 გეიმში ვერცერთმა ჩოგბურთელმა ვერ მოახერხა საკუთარი ჩაწოდების მოგება, მაგრამ ეს სცენარი უკრაინელს აწყობდა და საქმე საბოლოო გამარჯვებამდე მიიყვანა.

გორგოძეს ეისი არ ჰქონია და 2 ორმაგი შეცდომა დაუშვა, ხოლო უკრაინელმა 2 ეისი და 3 ორმაგი შეცდომა მიითვალა.

ეკო გორგოძე მაიამიში წყვილთა თანრიგშიც იასპარეზებს გრეტი მინენთან ერთად, რომლებიც პირველ წრეში 24 მარტს, დესირაე კრავჩიკსა და დერმი შუურსს დაუპირისპირდებიან.