2022 წლის რაგბი ევროპის ჩემპიონატის გამარჯვებული 20 მარტს „დინამო არენაზე“ გაირკვევა. საქართველო ესპანეთს 18 საათზე მასპინძლობს და თასის მე-14-ედ მოსაპოვებლად მხოლოდ გამარჯვება ჭირდება.

ესპანეთი კარგ ხასიათზე და უკეთესი პოზიციით მოდის. პორტუგალიასთან გამარჯვებით მათ მსოფლიო თასის საგზური ისტორიაში მეორედ მოიპოვეს და რაგბი ევროპის ჩემპიონატზე პირველობა შეინარჩუნეს. ბორჯღალოსნები მეტოქეს 2 ქულით ჩამორჩებიან და მომავალი თამაშისთვის შესაბამისი განწყობით ემზადებიან.

„შევარდენზე“ მათ დღეს ღია ვარჯიში გამართეს, რის შემდეგაც ლაშა ხმალაძემ და გიორგი ჭყოიძემ ჟურნალისტების კითხვებს უპასუხეს. ვარჯიში, რომელიც 1 საათზე ოდნავ მეტხანს გაგრძელდა ორმხრივ, მართვად თამაშს მოიცავდა.

ლაშა ხმალაძე: „რუმინეთთან ყოველთვის დაძაბული და ძალისმიერი თამაში გვაქვს, რადგან ფიზიკურად ძლიერი, მძიმე მოთამაშეები ყავს. ასე იყო გასულ შაბათსაც. გვქონდა შეცდომები, რამაც ჩვენზე წნეხი გააძლიერა, თუმცა საბოლოოდ გამარჯვება მაინც შევძელით“.

„ესპანეთთანაც არაერთხელ გვითამაშია და ამ გუნდს კარგად ვიცნობთ. ფაქტია, რომ წელს ისინი კარგ ფორმაში არიან და მათი დაუფასებლობა არ იქნება. ეს ფინალია, რომელიც რიგითი შეხვედრებისგან განსხვავდება, სხვა განწყობაა და შესაბამისი შემართებით ვემზადებით“.

„სასიამოვნოა, რომ ფინალის გამართვა საკუთარ მოედანზე, საკუთარი გულშემატკივრის წინაშე მოგვიწევს. ეს ჩვენთვის დამატებითი მოტივაცია და პასუხისმგებლობაა“.

გიორგი ჭყოიძე: „მოსამზადებელმა კვირამ კარგად ჩაიარა. გავიარეთ ჩვენი ძლიერი და მეტოქის სუსტი მხარეები. ვთვლი, რომ კვირის თამაშისთვის 100% მზად ვართ. გულშემატკივარს მოვუწოდებ, რომ მოვიდეს სტადიონზე და ჩვენის მხრივ, მათ გასახარებლად ყველაფერს გავაკეთებთ“.

„რუმინეთისთვის ჩვენთან თამაშის შედეგს დიდი მნიშვნელობა ქონდა, რადგან მსოფლიო თასის პირდაპირი საგზურისთვის იბრძოდა. კარგი გუნდია და რთული თამაში გამოდგა, თუმცა მიზანს – გამარჯვებას, მაინც მივაღწიეთ. გვქონდა შეცდომები და ვეცდებით, ესპანეთისთვის ეს შეცდომები მინიმუმამდე დავიყვანოთ“.

RUGBY.GE