მადრიდის „რეალის“ მთავარმა მწვრთნელმა კარლო ანჩელოტიმ „პარი სენ ჟერმენთან“ მარცხის (0:1) შემდეგ ისაუბრა. როგორც იტალიელმა სპეციალისტმა აღნიშნა, საპასუხო შეხვედრაში მისი გუნდი სხვანაირად ითამაშებს და პარიზში დაპირისპირების მხოლოდ პირველი ნაწილი იყო.

„საუკეთესო მატჩი არ გვქონია, მაგრამ ეს დაპირისპირების მხოლოდ პირველი ნაწილია, ჩვენს სტადიონზე სხვანაირად ვითამაშებთ. ბურთის თავდამსხმელებამდე მიტანის პრობლემა გვქონდა, პასებში შეცდომებს ხშირად ვუშვებდით, პრესინგი ვერ დავძლიეთ, მეტოქე ძლიერი იყო და გაგვიჭირდა.

მეორე მატჩში ცოტა მეტი ზეწოლა დაგვჭირდება, რადგან ვაგებთ, ასევე მოგვიწევს ბურთთან უფრო ზუსტად მუშაობა. მბაპე ამჟამად ევროპის საუკეთესო ფეხბურთელია, მან გადაწყვიტა მატჩის ბედი. კაზემირო და მენდი საპასუხო მატჩში დისკვალიფიცირებულნი არიან და მათ შევცვლით, მაგრამ ვფიქრობ, რომ ორივე ბარათი გარკვეულწილად ზედმეტი იყო, ამიტომაც, ეს ორსატოსაც ვუთხარი“, - განაცხადა ანჩელოტიმ.

შეგახსენებთ, რომ „რეალისა“ და „პარი სენ ჟერმენის“ საპასუხო მატჩი 9 მარტს, მადრიდში გაიმართება.