„პარი სენ ჟერმენის“ მთავარმა მწვრთნელმა მაურისიო პოჩეტინომ „რეალთან“ (1:0) გამარჯვების შემდეგ კომენტარი გააკეთა. არგენტინელი სპეციალისტის განცხადებით, მისმა გუნდმა მოგება დაიმსახურა, მაგრამ საპასუხო შეხვედრაში კონცენტრირებულები უნდა იყვნენ.

„ძალიან ბედნიერი ვარ, გუნდმა ძალიან კარგად ითამაშა, ზოგადად „რეალზე“ უკეთ ვითამაშეთ და გამარჯვებას ვიმსახურებდით. წინ კიდევ ერთი მატჩია, მაგრამ პირველი ნაბიჯის გადადგმა მნიშვნელოვანი იყო.

ზეწოლა მოვახდინეთ მათ ნახევარმცველებზე და კომბინაციური ფეხბურთის თამაშის საშუალება არ მივეცით. ბევრი ვიმუშავეთ და ვცდილობდით ბურთი მაქსიმალურად მაღლა შეგვენარჩუნებინა. თამაშს 90 წუთის განმავლობაში ვაკონტროლებდით. ფეხბურთელები ამ შედეგს იმსახურებდნენ. თუმცა, მეორე მატჩში კონცენტრირებულები უნდა ვიყოთ“, - თქვა პოჩეტინომ.

შეგახსენებთ, რომ „რეალისა“ და „პარი სენ ჟერმენის“ საპასუხო მატჩი 9 მარტს, მადრიდში გაიმართება.