საქართველოს მორაგბეთა ნაკრებმა რაგბი ევროპის 2022 წლის სეზონში პირველი გამარჯვება მოიპოვა და ამსტერდამში, ნიდერლანდების ნაკრებს ძალიან იოლად, 72:10 მოუგო.

ლევან მაისაშვილის გუნდმა ერთი კვირის წინ მოულოდნელად პორტუგალიასთან შინ ფრედ ითამაშა და ცხადია, საქმე სარეაბილიტაციოდ ჰქონდა. თუმცა, საზომად ნიდერლანდები ნამდვილად ვერ გამოდგება, რადგან რაგბი ევროპის ტურნირში ცალსახად ყველაზე სუსტი გუნდია.

„ბორჯღალოსნებმა“ იმდენად იოლად მოიგეს, რომ თამაშის დეტალური აღწერისგან თავის შეწყენას აზრიც არ აქვს, მაგრამ იყო ხარვეზებიც - მაგალითად, ნიდერლანდებმა მიმდინარე ტურნირზე პირველი ქულები და საერთოდაც, პირველი ლელო მიითვალა. ამაზე სამწვრთნელო შტაბს ყურადღების გამახვილება მართებს, რადგან იყო თამაშში შეცდომები, რომელსაც ნიდერლანდების ნაკრებზე უფრო მაღალი დონის მეტოქეები ნაკლებად არ გვაპატიებენ.

მთლიანობაში საქართველოს ნაკრებმა 12-ჯერ უწია მეტოქის ჩათვლის მოედანს და ჰეთ-თრიქი შეასრულა ოთარ გიორგაძემ. დუბლები გაიფორმეს ვასილ ლობჟანიძემ, გიორგი ჭყოიძემ და აკა ტაბუცაძე, ხოლო თითო ლელო თორნიკე ჯალაღონიას, ლუკა ჯაფარიძისა და მირიან მოდებაძის აქტივშია.

„ბორჯღალოსნებმა“ რასაკვირველია ბონუს ქულაც მიითვალეს და ორი ტურის შემდეგ 7 ქულით მეორე ადგილზე არიან, ლიდერი კი ესპანეთის ნაკრებია 9 ქულით. მოგეხსენებათ, რაგბი ევროპის ეს სეზონი მსოფლიოს 2023 წლის ჩემპიონატის საკვალიფიკაციო ეტაპიცაა, მაგრამ ლევან მაისაშვილის გუნდს წინა სეზონიდან უკვე პრაქტიკულად განაღდებული აქვს მსოფლიო თასის საგზური. საქართველოს ნაკრები რაგბი ევროპის მესამე ტურში 27 თებერვალს, თბილისში, რუსეთის ნაკრებს დაუპირისპირდება.

ნიდერლანდები - საქართველო 10:72 (3:29)