ინგლისის ჩემპიონშიფის 31-ე ტურში შოთა არველაძის „ჰალ სიტი“ „დერბი ქაუნთის“ ესტუმრა და 1:3 დამარცხდა. შედეგად, ქართველი სპეციალისტის გუნდმა მიჯრით მეორე მარცხი განიცადა.

„დერბის“ უეინ რუნი ავარჯიშებს და ლეგენდარული ინგლისელის გუნდმა მეტოქეს პრაქტიკულად ყველაფერში აჯობა, 47-ე წუთისთვის 3:0-საც ამარცხებდა, „ჰალმა“ მხოლოდ ის მოახერხა, რომ პრესტიჟის გოლი გაიტანა.

48 წლის ქართველი სპეციალისტის ხელმძღვანელობით „ჰალმა“ მესამედ ითამაშა. თავიდან იყო „სუონსთან“ მოგება (2:0), ამას კი ორი მარცხი მოჰყვა „პრესტონთან“ (0:1) და ახლა „დერბისთან“.

„ჰალ სიტი“ 30 თამაშში მოპოვებული 32 ქულით მე-19 ადგილზეა, თუმცა, გავარდნის საშიშროების წინაშე ჯერ ნამდვილად არ დგას, რადგან სახიფათო ზონას 12 ქულით უსწრებს. მომდევნო ტურში არველაძის შეგირდები 12 თებერვალს საკუთარ მოედანზე ჩემპიონშიფის ლიდერ „ფულჰემს“ შეხვდებიან.