მიმდინარე კვირაში ინგლისის პრემიერლიგის მატჩები არ გამართულა. სამაგიეროდ, ასოციაციის თასის მესამე რაუნდის (ჩვენებურად 1/32 ფინალი) შეხვედრები ჩატარდა, რომელთაგან რამდენიმეზე შევაჩერებთ მკითხველის ყურადღებას.

ყველაზე ხმაურიანი ამბავი ალბათ, კირან ტრიპიერის ნიუკასლური დებიუტი იყო, რომელიც 12 მილიონ გირვანქად იყიდეს „კაჭკაჭებმა“ მადრიდის „ატლეტიკოსგან.“ სპეციალისტები მიიჩნევენ, რომ ზამთრის სატრანსფერო ფანჯარა ერთობ დატვირტული იქნება „ნიუკასლისთვის.“ გუნდი პრემიერლიგაში გასავარდნ ზონაშია და შველა სჭირდება. მათი ახალი მდიდარი არაბი ინვესტორები კი არაფით დაუშვებენ ლიგიდან დაქვეითებას.

ინგლისში რაღაც სატრანსფერო ბაზრის რევოლუციაზეც ალაპარაკდნენ და ტრიპიერის ყიდვას „ნიუკასლისთვის“ დიდი ამბების პირველ მერცხლად განიხილავენ. ვნახოთ.

ამჯერად კი „კაჭკაჭებმა“ ასოციაციის თასზე რანგით მესამე დივიზიონის წარმიმადგენელ „კემბრიჯთან“ 0:1 წააგეს და ტურნირს დაემშვიდობნენ. ტრიპიერს კი დებიუტი ჩაუმწარეს. ერთადერთი გოლი 56-ე წუთზე ვინმე ჯო აირონსაიდმა გაიტანა.

თასის მოქმედმა მფლობელმა, „ლესტერმა,“ ჩისკოს ყოფილი კლუბი, „უოტფორდი“ 4:1 გაანადგურა და შემდეგ წრეში გავიდა. ახლა „უოტფორდს“ იტალიელი კლაუდიო რანიერი წვრთნის, რომელმაც „მელიები“ 2016 წელს ინგლისის ჩემპიონები გახდა. მაგრამ ამჯერად მისი „კინგ ფაუერის“ სტადიონზე გამოჩენა იღბლიანი ვერ გამოდგა.

მასპინძელთაგან გოლები იური ტილემანსმა, ჯეიმს მედისონმა, ჰარვი ბარნსმა და მარკ ოლბრაიტობმა გაიტანეს. სტუმართაგან თავი ჟოაუ პედრომ გამოიჩინა.

მეორე ტაიმის დასაწყისში სტადიონზე შუქი გამოირთო და მსაჯმა, ცხადია, თამაში შეაჩერა. თუმცა, ამ ხუთწუთიან მონაკვეთში „უოტფორდმა“ სამი ცვლილება განახორციელა...

ტრიბუნებზე კი გულშემატკივრებმა მობილური ტელეფონები აანთეს და შემოსძახეს: „ჩვენ „ლესტერი“ ვართ და სიბნელეშიც ვითამაშებთ!“

„სიტიმ“ სტუმრად „სუინდონი“ გაანადგურა (1:4), „ჩელსიმ“ კი შინ „ჩესტერფილიდი“ - 5:1.