მსოფლიოს პირველი ნომერი ჩოგანი ნოვაკ ჯოკოვიჩი აუცრელობის გამო ავსტრალიის ტერიტორიაზე არ შეუშვეს და შესაბამისად, ავსტრალიის ღია პირველობაზე ვერ ითამაშებს. ამ საკითხთან დაკავშირებით კომენტარი გააკეთა რაფაელ ნადალმა, რომელმაც თქვა, რომ სერბმა თავიდანვე იცოდა წესები და თუ აცრას არ გაიკეთებ, პრობლემებისთვის მზად უნდა აღმოჩნდე.
„ბუნებრივია, რომ ავსტრალიაში ხალხი გაბრაზდა, რადგან მათ მკაცრი ლოქდაუნის გავლა მოუწიათ. ერთადერთი, რისი თქმაც შემიძლია, არის ის, რომ მჯერა მედიცინის მცოდნე ადამიანების. ისინი თუ იტყვიან, რომ აცრა უნდა გავიკეთოთ, მაშინ ასე უნდა მოვიქცეთ. მსოფლიომ ძალიან ბევრი დარტყმა მიიღო რეგულაციების უგულებელყოფის გამო.
ყველა თავისუფალია არჩევანში და შეუძლია ის გააკეთოს, რაც თავისთვის საუკეთესოდ მიაჩია. თუმცა, არსებობს წესები: თუ აცრა არ გინდა, შეიძლება პრობლემები შეგექმნას. მას შეეძლო აცრა და ავსტრალიაში უპრობლემოდ შესვლა. რა თქმა უნდა, ვწუხვარ მის გამო, მაგრამ გარკვეული პერიოდის განმავლობაში იცოდა, როგორი მოთხოვნები იყო“, - თქვა ნადალმა.
შეგახსენებთ, რომ ნოვაკ ჯოკოვიჩს, ნადალისა და როჯერ ფედერერის დარად დიდი სლემის 20 ტიტული აქვს მოგებული და ისტორიული რეკორდის დასამყარებლად ერთადერთი დიდი სლემის მოგება სჭირდება.
