„ბარსელონას“ ნახევარმცველი ფილიპე კოუტინიო ზამთრის სატრანსფერო ფანჯარაში გუნდის დასატოვებლად ემზადება. ბრაზილიელი ფეხბურთელი კლუბის დატოვებას იანვარში დათანხმდა, რათა მეტი სათამაშო პრაქტიკა ჰქონდეს 2022 წლის მსოფლიო ჩემპიონატისთვის. ამის შესახებ The Sun-ი იტყობინება.

ესპანური კლუბის მთავარი მწვრთნელი ჩავი ნახევარდაცვაში ახალგაზრდა ფეხბურთელების გამოყენებას ამჯობინებს. კოუტინიოს ესმის, რომ ყატარის მსოფლიო ჩემპიონატზე მოსახვედრად მას მეტი თამაში სჭირდება. ვრცელდება ინფორმაცია, რომ „ლივერპულის“ ყოფილი ფეხბურთელი შესაძლოა პრემიერლიგაში დაბრუნდეს, მისით დაინტერესებულია „არსენალი“, „ევერტონი“ და „ტოტენჰემი“.

29 წლის კოუტინიომ მიმდინარე სეზონში ჩემპიონთა ლიგისა და ესპანეთის ლა ლიგაში 16 მატჩში მიიღო მონაწილეობა და ორი გოლი გაიტანა. ბრაზილიელ ფეხბურთელს „ბარსელონასთან“ კონტრაქტი 2023 წელს ეწურება.