აშშ-ის ღია პირველობის ჩემპიონმა ემა რადუკანუმ კორონავირუსის ტესტზე დადებითი პასუხი მიიღო, რის გამოც, ახალი სეზონის დაწყების გადადება მოუწევს. ის აბუ დაბიში, „მუბადალას“ მსოფლიო საჩოგბურთო ჩემპიონატის საჩვენებელ ტურნირზე ვეღარ გამოვა.

19 წლის ბრიტანელს, ვინც აშშ-ის ღია პირველობის ისტორიაში, საკვალიფიკაციო ეტაპ გამოვლილი პირველი ჩემპიონია, 16-18 დეკემბერს, აბუ დაბიში შვეიცარიელ ოლიმპიურ ჩემპიონ ბელინდა ბენჩიჩთან უნდა ეთამაშა.

„ძალიან მინდოდა, აქაური ფანების წინაშე მეთამაშა. მაგრამ კოვიდ-19-ზე დადებითი ტესტის შემდეგ, ამას ამჯერად ვერ შევძლებ. რეგულაციების შესაბამისად, ამჟამად იზოლაციაში ვიმყოფები და იმედი მაქვს, რომ კორტზე დაბრუნებას მალე შევძლებ“, - განცხადა რადუკანუმ.

ტურნირის ორგანიზატორებს მისი შემცვლელი ჯერ არ შეურჩევიათ.

აბუ დაბიში, ხანგრძლივი ტრავმული პაუზის შემდეგ, პირველად ითამაშებენ რაფაელ ნადალი და აშშ-ის ღიას შარშანდელი გამარჯვებული, ავსტრიელი დომინიკ თიმი. მათ გარდა, მამაკაცთა ბადში ასევე გამოვლენ ბრიტანელი ენდი მარი, რუსი ანდრეი რუბლევი, ნორვეგიელი კასპერ რუუდი და კანადელი დენის შაპოვალოვი.